Оҕолоор, эһиги тугу ордук интэриэһиргиигитий? Оҕолорго аналлаах сурунаалларга уонна хаһыттарга ким- туох туһунан ааҕыаххыт этэй?
Бүгүн түөрт дьүөгэлии кыргыттар бу тиэмэҕэ бэйэлэрин баҕа санааларын үллэстэллэр. Лена Жиркова, Настя Ан, Алина Бесчетнова уонна Нарыйаана Махатырова — Дьокуускай куорат Саха гимназиятын уонна 17- с нүөмэрдээх оскуолатын үөрэнээччилэрэ.
— Бастатан туран, биһигини ордук тэлэбиисэринэн уонна ютуб-ханаалынан көстөр биэриилэр интэриэһиргэтэллэр. Холобур : » Netflix» киинэ устар хампаанньа туһунан. Эбэтэр артыыстар олохторуттан сонуннары сэргээн ааҕыахпыт этэ.
Дьиэҕэ олорон эрэ дьарыктанар араас хамсаныылаах эрчиллиилэри бэчээттииллэрэ буоллар. Билигин «Тик ток» наһаа сайынна, биһиги онно араас интэриэһинэй сорудахтары көрөбүт, сороҕун биһириибит.
Инфографика быһыытынан оҥоһуллубут сайыннарар, үөрэххэ туһалаах информациялары. Холобур (Лена Жиркова) , мин сайын үлэлиэхпин баҕарабын, бэйэбэр дохуот киллэринэр баҕалаахпын. Оскуола оҕото сайын ханна үлэлиэн сөбүн испииһэгэ, хамнастара интэриэһинэй буолуо дии саныыбын.
«Правильное питание»—ол аата сөптөөхтүк аһыыр туһунан сүбэлэр наадалар. Кыыс эрэ барыта ырыан, кыраһыабай буолуон баҕарар.
«Топ-10 самых», холобур Россияҕа, омук сиригэр баар «престижнай» үөрэх кыһаларын туһунан, ханнык саҥа идэлэр баар буоллулар? Ол туһунан эмиэ биһирээн туран ааҕыахпыт этэ.
Дьоппуоннар комикстарын курдук сахалыы комикстары тоҕо уруһуйдаабаттара буолуой? Оҕолор ордук комиксы сэргиибит.
«Мин төрөөбүт күнүм» диэн тиэмэҕэ сүбэлэри, оонньуулары ыйан биэрэргит буоллар.
Оҕо эрэ барыта кэриэй тылын билиэн баҕарар дии? Онон «Кэскилгэ», сахалыы- нууччалыы- кэриэйдии тылбааһы таһаарар «Кэриэйдии тыл муннуга» диэн баара буоллар. Биһиги ааҕан, көрөн, үөрэтиэхпит этэ.
Уонна дьиктилээх, кутталлаах үһүйээннэри, кэпсээннэри ордоробут.
Өссө биири этиэхпит этэ, хаһыат, сурунаал иһигэр » конфеткалаах», ол аата «купон» дуу, «скидка» дуу, эбэтэр араас тиэмэҕэ суруктаах кинигэ закладкалары бэчээттииллэрэ буоллар.
Биһиги баҕа санаабыт ити курдук. Интэриэһинэй кэпсээннээх хаһыаты , сурунаалы тутан олорон ааҕар ордук!
Ааптар: Татьяна Жиркова