Суруналыыс күннээҕи олоҕу араас өҥүнэн арылыйа оонньуур алмаас таас курдук гына киэргэтэр ураты талааннаах киһи. Мин оннук киһи буолуохпун баҕарабын. Билигин ити туһугар үлэлии-хамныы сылдьабын.
«Кэскил» хаһыаты алын кылааска сылдьан кылааһынан суруйтарар, ааҕар этибит. Онтон эрэллээх, чугас доҕорунан, 2014 сыллаахха, бэһис кылааска, буолбута. Кыра сылдьан уруһуйдуурбун сөбүлүүр этим. 136 киһи портретын уруһуйдаан, «Рекорды Кэскил» номинация кыайыылааҕа буолбутум. Таисия Ивановна Алексеева «136 мэтириэт» диэн ыстатыйа суруйбута. Дьэ, бу түгэҥҥэ оҕо үлэтин, ситиһиитин сыаналыыллар, дьон сөҕөр, тэҥҥэ үөрсэр эбит диэн өйдөөбүтүм. Ол хаһыат билигин портфолиобар баар. Ону таһынан, кини өссө 2021 сыллаахха «Төрөөбүт тыл умсулҕаныттан» диэн хоһоону суруйуум туһунан таһаарбыта. Кини онно үөрбүтэ уонна соһуйбута: уруһуйдьут оҕо суруналыыс буолан эрэр диэн. Ол курдук, билигин Таисия Ивановналыын номнуо бииргэ үлэлии сылдьарбыттан үөрэбин, киэн туттабын.
2017 сыллаахха Василий Петрович Иванов уруһуй лааҕырыгар сылдьыбыппын, айар үлэм туһунан «Дьүкээбил дьиримниир уруһуйдара» диэн ыстатыйа суруйбута. Хаһыакка тэттик ыстатыйаларым тахсаллар этэ. Оскуоланы бүтэрэр сылбар саайтк элбэхтэ суруйбутум. Элбэх суруйууттан төрөөбүт тыл проблематын туһунан суруйуум элбэх киһи биһирэбилин ылбыта.
Бэһис кылааска оскуолатааҕы пресс-кииммэр киирбитим, онтон алтыска эрэдээктэр буолан, биэс сыл үлэлээбитим. Сэттис кылаастан улуустааҕы «Хотугу Кыым» хаһыакка ыстатыйалары суруйар буолбутум. Угуйбут, үөрэппит киһим, РФ суруналыыстарын сойууһун чилиэнэ, уонтан тахса кинигэ ааптара, учууталым, наставнигым, Анастасия Гаврильевна Сорокоумова буолар. Кинилиин икки кинигэни суруйан таһааттардыбыт. Ити курдук суруналыыстыка эйгэтигэр сыыйа-баайа киирэн испитим.
Туохтааҕар да суруйарбын сөбүлүүбүн. Суруйдахпына санаам чэпчиир, дууһам үөрэр. Хаһыакка, сурунаалга эрэ буолбакка, бэйэм ис санааларбын, үөрбүт, хомойбут түгэннэрбин, аан дойдуга туох буола турарын сыаналаан суруйабын.
Билигин ХИФУ ХИНТуоКИ 1 куурсун устудьуона буолабын, «Кэскилбэр» үлэбин анал кэрэспэдьиэн буолан олунньу ый бүтүөҕүттэн саҕалаабытым. Оҕо суруналыыһа күннээҕи суруйуунан муҥурдаммакка, маассабай үлэни тэрийэр, ааҕааччытын, учууталлары кытта ситим олохтуур. Биһиги инникибит — оҕолор уонна эдэр ыччат. Кинилэр кэскиллээх олоҕу түстэһэр дьон буолалларын туһугар үлэлиибит. Аныгы кэм тосхойон, бэчээппит кыһатыгар сайдыы харахха өтө көстөр. Өссө да саҥа арыйыылар, ситиһиилэр арыаллыы туруохтара!
Хаһыаппыт кырдьыбат, сүппэт анала аатыгар да сытар. «Кэскиллиин» бииргэ үүнүөххэ, сайдыахха! Бүгүҥҥү үөрүүлээх күнүнэн кэлэктииппитин, өр сылларга үлэлээбит суруналыыстары, оҕолору, төрөппүттэри, учууталлары итиитик-истиҥник эҕэрдэлиибин!
Эльдар САДОВНИКОВ.