Кэрэтик уонна тэтимнээхтик хамсаныы, сылбырҕатык туттуу, артыыстааһын – бу барыта үҥкүү спордугар ананар. Бүгүн «Модун» спорт комплексыгар үҥкүү спордун үөрүүлээх аһыллыыта уонна күрэхтэһиитэ буолла.
Үөрүүлээх аһыллыыга СӨ Быраабытылыстыбатын Бэрэссэдээтэлэ Кирилл Бычков, Саха Республикатын үҥкүүгэ спордун сойууһун президенэ Людмила Николаева кыттааччыларга үтүө баҕа санааларын тиэртилэр.
Үҥкүү спордугар уопсайа 7 күүстээх паара кытынна. Спортсменнар Москва куораттан, Монголия дойдутуттан, Урал, Уһук Илин, Сибиир бэдэрээлинэй уокуругуттан бэйэлэрин кыахтарын холонон көрдүлэр. Спортивнай үҥкүүгэ республика чиэһин Саха сирин сүүмэрдэммит хамаандатыттан 2 паара көмүскээтэ: Арылхан Данилов уонна Миласлава Мазанова, Анита Федорова уонна Тимофей Проводин.
Кыттааччылар икки программанан үҥкүүлээтилэр. Бастакытынан, европейскай үҥкүү. Онно бытаан вальс, танго, венскай вальс, бытаан фокстрот, квикстеп киирэр. Иккиһинэн, латиноамериканскай үҥкүү: самба, ча-ча-ча, румба, пасодобль уонна джайв.Барыта 10 үҥкүү көрүҥүн толорор кыттаччылар дэгиттэр үҥкүүһүт буолаллар.Оҕолор оонньуу иннинэ уһун дьарыктарыгар икки бүк күүстээхтик эрчиллибиттэр. Манна судьуйалар имигэс үҥкүүнү эрэ буолбакка, мимика, сирэй-харах туттуутун, көнөс сиһи кытта эрчим, тэтим баарын тэҥинэн ирлииллэр. Хас биирдии үҥкүү аайы – уратытык артыыстааһын, көстүүм уларыйыыта, туспа хамсаныы. Бу сүрдээх улахан сыралаах үлэттэн тахсар. Долгуйуу, эрэл – хас биирдии кыттааччы уонна тренер санаатыгар баар.
Людмила Николаева, Саха Республикатын үҥкүүгэ спордун сойууһун президенэ:
— Оҕолор олус бэркэ кытыннылар, долгуйуу баар. Араас дойдуттан күүстээх бэлэмнээх пааралар кэлбиттэр. Бу оҕолор Арассыыйа чемпионнара буолаллар. Өр кэмнээх тохтобул кэнниттэн, 2008 сылтан үҥкүү спорда сөргүтүллэн киирдэ. Аныгыс оонньууларга өссө элбэх спортсмен баар буолуо диэн эрэнэбин. Үҥкүү спорда – олус кыраһыабай көрүҥ. Саха сирин олохтоохторо аан дойду үрдүнэн биир саамай кэрэ спорду көрөр кыахтаммыттарыттан олус үөрдүм.
Күүстээх киирсии түмүгүнэн, III миэстэ Сибиир Федеральнай уокуругуттан Дмитрий Мельников уонна Анастасия Самойлова; II миэстэ Москва куораттан Матвей Рублев уонна Анастасия Самойлова буоллулар. Кыайыы үрдүк аатын Ураллааҕы Федеральнай уокуругуттан Лев Огорельцев уонна Валерия Подрядова ыллылар.
Кыттааччылар көрөөччүлэргэ, үҥкүү спордун сэҥээрээччилэргэ сэргэх үҥкүүнү, умнуллубат элбэх түгэни, чаҕылхай иэйиини бэлэхтээтилэр!
Матырыйаалы бэлэмнээтилэр Илона Руфова, Джулия Дорофеева, Гаврил Прокопьев оҕо пресс-киинин юнкордара