В.П. Ларионов аатынан Майа орто оскуолатыгар иитэр-үөрэтэр үлэ кэнчээри ыччаты аныгы тэтимнээх олоххо тус миэстэтин булунар, талба талааннаах ситиһиилээх киһи гына иитэн таһаарыыга туһуланар. Онуоха, дьүккүөрдээх үлэ түмүгүнэн, араас күрэхтэргэ, кэмпириэнсийэлэргэ, олимпиадаларга үрдүк таһымнаахтык кыттыбыт ситиһиилээх үөрэнээччилэри чиэстиир сыаллаах «Сулустар парааттара» тэрээһин сыллата үгэс быһыытынан далааһыннаахтык ыытыллар.
Түмсүүлээх оскуола сомоҕо кэлэктиибэ бүттүүн долгуйа күүтэр үөрүүлээх тэрээһинэ быйыл кулун тутар 30 күнүгэр ыытылынна. Бэлиэ күн ыалдьытынан оскуола выпускнига, попечитэлэ, СӨ култуураҕа уонна духуобунай сайдыыга миниистирэ Юрий Степанович Куприянов буолла. Тэрээһин Саха АССР тэриллибитэ 100 сылыгар, өрөспүүбүлүкэҕэ үөрэҕирии тиһигэр Ааҕыы сылыгар, Мэҥэ-Хаҥалас улууһугар бигэ туруктаах дьиэ кэргэн, үөрэҕирии тиһигэр кэнчээри ыччаты култуурунай нэһилиэстибэҕэ сыһыарыы сылларыгар ананна.
Ытык ыалдьыт Юрий Степанович Майа орто оскуолатыгар үөрэммит үтүө сылларын, билии биэрбит учууталларын махтал үтүө тылларынан ахтан туран, үөрэнээччилэргэ төрөөбүт сирдэригэр бэриниилээх, биир дойдулаахтарыгар, оскуолаларыгар махталлаах дьоһун дьон буола улааталларыгар баҕа санаатын тиэртэ. Итиэннэ, 11 кылаас үөрэнээччилэригэр Алена Стручковаҕа уонна Валерия Макароваҕа өрөспүүбүлүкэ волонтерскай хамсааһынын сайдыытыгар тус кылааттарын киллэрбиттэрин иһин СӨ култууратын уонна духуобунай сайдыытын Министиэристибэтин махтал суругун туттарда.
Бу күн оскуола тумус туттар үөрэнээччилэрэ хабыллар ытыс тыаһынан доҕуһуоллатан кыһыл көбүөр устун хааман киирэн наҕараадаланнылар, түбүктээх үлэ үтүө түмүгүн – долгутуулаах үөрүү өрөгөйүн биллилэр. Кинилэр кимнээҕий?
Бүтүн Арассыыйатааҕы билим кэмпириэнсийэлэрин, «АГРОНТИ», «Ворлдскиллс-джуниор» дойду таһымнаах чемпионат кыайыылаахтара, бастыҥ олимпиадниктар, айар-тутар дьоҕурдаах талааннаах үөрэнээччилэр, эрчимнээх спортсменнар!
Улууспут инники эрэллэрэ буолар үөрэнээччилэрбит кыһамньылаах үлэлэрин түмүгүнэн, В.П. Ларионов аатынан Майа орто оскуолата бүтүн Арассыыйатааҕы «WorldSkillsRussia» юниордар хамсааһыннарыгар 100 бастыҥ үөрэх тэрилтэлэрин кэккэлэригэр киирбитэ. Быйыл өрөспүүбүлүкэҕэ 17 үөрэнээччи ситиһиилэммититтэн 8 үөрэнээччи кыһыл көмүс мэтээли ылла. Уфа, Сыктывкар, Новосибирск, Южно-Сахалинск куораттарга чемпионат Арассыыйатааҕы түһүмэҕэр өрөспүүбүлүкэ чиэһин көмүскүүллэр. Билим кэмпириэнсийэлэрин дойду таһымнаах түһүмэҕэр 8 үөрэнээччи таҕыста. 17 үөрэнээччи өрөспүүбүлүкэтээҕи олимпиадаларга кыттыбытыттан, 3 оҕо ситиһиилэнэн дойду таһымнаах түһүмэххэ кыттар чиэскэ тигистилэр. Бүтүн Арассыыйатааҕы тыа оскуолаларын оҕолорун икки ардыгар Новосибирскай куоракка ыыттыллыбыт «АГРОНТИ» күрэххэ 4 оҕо кыайыылаах үрдүк аатын ылбыттара. Өрөспүүбүлүкэҕэ, Уһук-Илиннээҕи күрэхтэһиилэргэ ситиһиилэрдээх 6 спортсмен чиэстэннэ.
Үөрүүлээх түгэҥҥэ, музыка учуутала Светлана Борисова – «СӨ култууратын туйгуна», история учуутала Михаил Самсонов – «СӨ үөрэҕин туйгуна», саха тылын учуутала Марфа Семенова, технология учуутала Коммунар Черкашин – «Саха сирин эрэлэ» бэлиэлэринэн наҕараадаланнылар.
Бу курдук, кэнчээри ыччаттарбыт кыайыы кынаттанан үрдүккэ дьулуһаллар, улууспут, өрөспүүбүлүкэбит аатын киэҥ эйгэҕэ ааттаталлар.
Изабелла РОМАНОВА.