2025-2026 үөрэх дьылын Арассыыйа үтүөлээх образцовай «Кэнчээри» норуодунай ансаамбыла 54-с сылын үрдүк көрдөрүүлэрдээх, үгүс ситиһиилэрдээх түмүктээбитэ.
Ол курдук, биһиги, «Кэнчээри» иитиллээччилэрэ, Кыргыстан өрөспүүбүлүкэтигэр М.К. Аммосов сырдык аатыгар сүгүрүйэн, саха култууратын көрдөрөн, Иссык Кульга православнай «Звездочка» лааҕырга сынньанан, духуобунас өттүнэн байан, аан дойдуга аатырбыт улуу Иссык Кульга дуоһуйа сөтүөлээн кэллибит.
Манна үс кэнсиэри көрдөрдүбүт. Бишкек куоракка Кастальскай «Малай Эктениятын», Каччини «Аве Мариятын» , Саха сирин, Кыргыстан гимнэрин түөрт куолаһынан ыллааммыт сөхтөрдүбүт.
Бу ыраах айаҥҥа турунарбытыгар Ил Түмэн вице спикерэ, депутаппыт Александр Николаевич Жирков тэрийиитинэн, Ил Дархан Айсен Сергеевич Николаев «Эльга Уголь» тэрилтэнэн спонсордатан көмөлөспүттэригэр махтанабыт.
Сыл устата «Музыка барыбытыгар», «Хотугу сулус», «Бриллиантовые нотки», норуоттар икки ардыларынааҕы хас да куонкурустарга Гран-при буоллубут.
Бу күннэргэ ыытыллыбыт «Музыка барыбытыгар» бырайыак «Розовая чайка» норуоттар икки ардыларынааҕы куонкуруһугар хорбут кыайан бастакы истиэпэннээх лауреат буоламмыт, «Поют дети России» Бүтүн Арассыыйатааҕы хоровой фестиваль өрөспүүбүлүкэтээҕи түһүмэҕэр эмиэ бастакы истиэпэннээх лауреат аатын ылбыппыт.
Уһук Илин уокурукка кыайаммыт, финалга киирэммит Арассыыйаҕа бүтүн Уһук Илин уокурук аатын көмүскүү, Сахабыт сирин, улууспутун ааттата Кострома куоракка барыахтаахпыт. Ону таһынан «Бары ыллыыбыт» диэн оҕолор ортолоругар ыытыллыбыт академическай ырыа куонкуруһугар солисткабыт Далаана Черкашина кыайан Хабаровскай куоракка Саха сирин аатын көмүскүө. Ситиһиини баҕарабыт!
Аны Бүтүн Арассыыйатааҕы оҕолор Форумнарыгар биир путевка бириэмийэ ыллыбыт. Онно мин, бөлөх старостата, солистка, барар чиэскэ тигистим. Онтон олус үөрдүм уонна долгуйдум. Ситиһиилээхтик кыттан кэлиэм диэн эрэннэрэбин.
Үҥкүүбүт бөлөҕө улуу Кытайга икки истиэпэннээх лауреат үрдүк аатын ылла. Уһуйааччыбыт Василий Степанович Парников бэс ыйын 30 – от ыйын 1, 2 күннэригэр Аммаҕа 4000-тэн тахса кыттааччылаах өрөспүүбүлүкэ педүлэһиттэрин дьаарбаҥкатыгар «Оҕолорго академическай ырыаны фольклортан классикаҕа диэри ыллыырга үөрэтии» диэн тиэмэҕэ маастар-кылаас ыытан киэҥник биһирэннэ. Екатерина Степановна кыргыттарынаан Сахаяналыын, Сандааралыын, эстетическэй киин үлэһиттэринээн Ульяна Петровналыын, Иннокентий Владиславовичтыын, Сардаана Захаровналыын «Музей в чемодане» диэн «Кэнчээри» ансаамбыл 54 сыл үлэлээн кэлбит историятын аныгылыы уникальнай технологиянан оҥорбут дакылаатынан 145 кыттааччылаах куонкуруска кыайыылаах буолла.
Ити курдук ааспыт үөрэх дьыла олус элбэх ситиһиилээх түмүктэннэ. Иннибитигэр өссө элбэх былааннар күүтэллэр.
Сардаана ДЬЯКОНОВА, Мүрү 1 №-дээх орто оскуолата,
«Кэнчээри» ансаамбыл корреспондена, Уус Алдан