Сэтинньи 26 күнүгэр Кэбээйи оскуолатын библиотекатыгар 1971 сыллаахха – 50 сыл анараа өттүгэр бүтэрбит выпускниктары кытары көрсүһүү буолан ааста.
Антонина Ильинична Васильева, Зинаида Ивановна Седалищева — иккиэн омук тылын учуутала идэлээхтэр, үөрэҕирии эйгэтигэр үлэлииллэр, Полина Пантелеймоновна Находкина – Полина-Победа – поэт. Ытык ыалдьыттарбыт оскуолабытыгар “Умнуллубат өйдөбүл – үөрэммит оскуолам – 50” диэн бэйэлэрин выпусктарын туһунан кинигэлэрин бэлэхтээтилэр, оскуолатааҕы сылларын, оскуола, учуутал киһи олоҕор суолтатын кэпсээтилэр.
Полина-Победа хайдах хоһоон эйгэтигэр кэлбитин, олоҕун умнуллубат түгэннэрин кэпсээтэ, олус истиҥник айбыт хоһооннорун өйүттэн аахта. «Киһиэхэ наар хамсаныы наада. Ол иһин күн аайы зарядкалааҥ, хамсана сылдьыҥ», — диэн сүбэлээтэ. Уонна бэйэтэ кун аайы оҥорор эрчиллиилэрин көрдөрдө.
Улуу Кыайыы күнүгэр күн сиригэр кэлбит буолан ийэтин баҕа санаатын ситэрэн Победа диэн аат ылыммыт эбит. Киһи өйө-санаата аһаҕас, сырдык, элбэх кыахтаах уонна өрүттээх буоларын көрдөрөн оннооҕор рэп аахта!
Түмүгэр норуодунай поэт «Тобуруокап көмүс күһүнүгэр» баран кыайыы көтөллөммүт “Тоҕо?” диэн хоһоонун аахпытын бары олус сэргээтибит. Күндүтүк ахтар-саныыр Кэбээйибит оскуолатыгар үөрэммит тэтэрээттэрин, В.И. Ленин мэтириэттээх значоктарын, муспут открыткаларын, кэмбиэрдэрин коллекциятын аҕалан көрдөрдө. Барыта олус кичэллээхтик, тапталлаахтык түмүллүбүт.
Биһиги түмсүүбүтүттэн хоһоону сөбүлүүр уонна айарга холонор оҕолор бу олус интэриэһинэй тэрээһиҥҥэ кытынныбыт, бэйэбит айбыт хоһооммутун ааҕан ыалдьыттарбытыттан хайҕанныбыт.
Библиотекарь Александра Алексеевна араас омук тылынан хоһооннору, Зинаида Ивановна латыынныы этиилэри бары кыттыылаахтарга анаатылар.
Бу көрсүһүү бэлиэтин быһыытынан Полина-Победа Кэбээйи оскуолатын быйылгы выпускниктарыгар суруйбут «Алгыс тыл» хоһоонноох календарь бэлэх туттубут. Бу истиҥ көрсүһүүнү олохпут устата оскуолаҕа, учууталларга махтал, олоххо, төрөөбүт дойдуга таптал үтүө холобурун быһыытынан өйдүү-саныы сылдьыахпыт.
Суруйда Яна Левина, 11 кылаас, «Нуклеус» түмсүү.