Тыа сирин олоҕун-дьаһаҕын биир сүрүн тэрилтэтинэн олох-дьаһах коммунальнай хаһаайыстыбата буолар. Бу тэрилтэ кыһыннары-сайыннары тохтоло суох үлэлээн, нэһилиэк олохтоохторун тыын боппуруостарын быһаарар. Олор дьиэлэрбитин, үөрэнэр оскуолабытын кимнээх сылааһынан хааччыйалларын билээри, Кэбээйитээҕи ОдьКХ главнай инженерэ Иван Филиппович Тереховы кытта көрсөн сэһэргэстибит.
– Иван Филиппович, үтүө күнүнэн! Биһиги нэһилиэкпитигэр хас котельнай баарый? Ханнык объектары итиинэн хааччыйарый?
— Күн бүгүн Кэбээйи улууһугар икки ОдьКХ филиала үлэлии-хамсыы турар. 1996 сылтан «Заречнай» филиал тэриллэн, уопсайа 12 бөһүөлэги, 98 эбийиэги 16 хочуолунай итиинэн хааччыйан олорор. Уопсайа 122 үлэһиттээхпит. Хас биирдии хочуолунайга 4 оператор, 1 сантехник, 1 электрик үлэлиир. Онон ОДьКХ биһиги олохпутугар 9 ый тухары тохтобула суох үлэлии турарыгар дьулуһабыт.
— Оттук сезона хайдах баран иһэрий, туох өрөмүөн үлэтэ ыытылынна?
— Быйылгы оттук сезона этэҥҥэ, улахан быһыылаана суох, хочуол тохтооһуна суох сылы түмүктээн эрэр. Өрөмүөн сылын ахсын былаан быһыытынан баран иһэр,саҥа объектар үлэҕэ киирэллэр.
— Биһиги нэһилиэкпитигэр кыстыгы туоруурга төһө газ нааданый?
— Кэбээйи улууһугар хочуолнайдар сүүс быраһыан бары гааһынан үлэлииллэр. Ол курдук сылга 1854 тыс куб гааһы “СахаТрансНефтьГаз” тэрилтэтиттэн атыылаһан туттабыт. Кыстыгы этэҥҥэ туоруохпут диэн эрэнэбит.
-Оператордар сылааһы биэрэр тэрилтэ тутаах дьонноро буолаллар. Кинилэр кимнээҕий?
– Кырдьык, биһиги оператордарбыт тэрилтэ, нэһилиэк тутаах дьонноро буолаллар. Төһө да ыарахан үлэҕэ үлэлээтэллэр, нэһилиэккэ ыытыллар араас хабааннаах дьаһалларга көхтөөхтүк кытталлар, элбэх ситиһиилэри аҕалаллар, тэрилтэ, нэһилиэк аатын куруутун үрдүктүк ааттаталлар.
Онон, биһиги нэһилиэкпит тутаах тэрилтэ үлэтин билсэн, хочуолунайга сылдьан баран, үлэһиттэрэ олус уустук уонна эппиэтинэстээх үлэлээхтэр, нэһилиэккэ, улууска баар тутууну барытын кэриэтэ итиинэн хааччыйалларын биллибит. Тымныы кыһыннаах Сахабыт сиригэр хас биирдии дьиэни-уоту итиинэн хааччыйар дьоммутугар махтал истиҥ тылларын аныыбыт.
Сайаана Терехова, 10 кылаас,
Хаартыскаҕа түһэрдэ, видеоҕа уһулла Виолетта Левина, 10 кылаас,
«Дьоҕур» медиакиин, Кэбээйи орто оскуолата