Кэбээйи орто оскуолатын иһинэн үлэлиир «Экос» лааҕыр үлэтин туhунан салайааччыттан, учууталбыттан Вера Николаевна Заровняеваттан аҕыйах боппуруоска хоруйдууругар көрдөстүм.
— «Экос» лааҕыр 2000 с. айылҕаны уонна кыраайы үɵрэтэр хайысхалаах тэриллибитэ. Бэс ыйын саҕаланыыта «Маҥнайгы сибэккилэр», «Бэс ыйыгар – бэс ойуурга», «Балыктааhын — тɵрүт дьарыкпыт», «Экологическай халандаар», «Күɵллэрбитигэр – болҕомтону уонна кыhамньыны» диэн экскурсиялары ыытабыт. Салгыы оҕо бэйэтин чинчийэр тиэмэтинэн тус былаанынан дьарыктанар. Быйыл алтыс сылын кɵтүппэккэ өрөспүүбүлүкэтээҕи «Научное лето онлайн» бырайыакка кыттабыт. Бу ϴлүɵхүмэтээҕи ЦТРиГОШ (Центр творческого развития и гуманитарного образования школьников) салайааччыта, б.н.к. О.Ю. Рожкова тэрийбит бырайыага киэҥ далааhыннанан Саха сирин 24 улууhуттан уонна Арассыыйа үс эрэгийиэниттэн 300-н тахса үɵрэнээччини түмэр. Оҕолору хайысхаларынан учуонайдар салайаллар, — диэн лааҕыр туһунан кэпсээнин Вера Николаевна саҕалаата.
— Вера Николаевна, онтон быйыл сайын туох тэрээһиннэр ыытылыннылар?
— Быйыл Эколог күнүгэр «Нуклеус» түмсүүбүт лидерэ Таня Кобякова бастакы өрөспүүбүлүкэтээҕи «Юный инспектор охраны природы» куонкуруска ситиhиилээхтик кыттан кэллэ. Эколог күнүгэр аналлаах Бүтүн Арассыыйатааҕы экологическай диктаҥҥа, «Марш парков» акция «Тыаларбытын харыстыаҕыҥ» уонна «Тɵрɵɵбүт дойдум» куонкурустарыгар кытынныбыт. Бастыҥ эколог оҕолорбут улуустааҕы П.Д. Степанов аатынан кыраайы үɵрэтэр түмэлгэ от күɵх хаалтыстаах эколог пионердар кэккэлэригэр киирдилэр. Түмэлгэ Григорий Константинович улууспут айылҕатыгар аналлаах саала экспонаттарын олус интэриэhинэйдик билиhиннэрдэ. Кыhыл кинигэҕэ киллэриллибит ураанай (лысуха), буҕарҕана (пастушок), дьаҕыл уйус (серая утка), мороду (чирок клоктун), кутан (серая цапля), алтан харах (пискулька) тустарынан, сэдэхтик кэлэн ааhар кɵтɵрдɵр, ону таһынан кэлин элбээн эрэр бакланнар тустарынан кɵрдɵрɵн кэпсээтэ. Ытык сиргэ оҕолорго хаалтыстарын быйылгы эколог пионер выпускниктарбыт Таня Кобякова, Вася Спиридонов уонна түмэл дириэктэрэ, оскуолатааҕы сылларыгар бастыҥ пионер буолан «Артек», «Орленок» лааҕырдарга сынньаммыт Г.К. Егоров баайдылар. Сотору биир оҕобут өрөспүүбүлүкэтээҕи эколог пионердар сүлүɵттэригэр «Сосновый бор» кииҥҥэ кыттыаҕа, билиитин-кɵрүүтүн хаҥатыаҕа.
Учууталбытыгар кэпсээҥҥэр махтанабын, ситиhиини, торумнаммыт үлэ туолуутун, умнуллубат кэрэ ɵйдɵбүллэри баҕарабын.
Лия Филиппова, «Нуклеус» пост, Кэбээйи.
keskil14.ru