Бэрэсидьиэн Владимир Путин бэс ыйын 27 күнүгэр 2023 сылы «Арассыыйа Федерациятыгар Педагог уонна настаабынньык сылын ыытар туһунан» Ыйааҕы таһаарбыта. Тохсунньу 18 күнүгэр Кэбээйи орто оскуолатыгар Педагог уонна настаабынньык сылын арыйыы үөрүүлээх тэрээһинэ ыытылынна.
Тэрээһин саҕаланыытыгар оскуола директора Анна Егоровна Обутова быйылгы бэлиэ сыл хаамыытын сырдатта уонна бүгүҥҥү тэрээһин сыалын-соругун билиһиннэрдэ, бу бэлиэ сылга ситиһиилээхтик үлэлииргэ-хамсыырга ыҥырда.
Директоры үөрэтэр-иитэр үлэҕэ солбуйааччы Марфа Ивановна Федотова оскуолаҕа эдэр учууталлар түмсүүлэрин историятын сырдатта. Маны сэргэ оскуола 4 эдэр учууталыгар настаабынньыгынан үлэлии сылдьар учууталлары билиһиннэрдэ. Сыл биллэриллибитин кэрэһэлээн, настаабынньыктарга уонна эдэр учууталларга «Год педагога и наставника» диэн туоһу сурук туттарылынна.
Сыл сүрүн сыалынан настаабынньык уонна эдэр учуутал хардарыта методическай көмөнү оҥорсуохтаахтар. Маны сэргэ элбэх тэрээһин ыытыллара былааннанар.
Бэлиэ күн биир үөрүүлээх түгэнинэн учууталларга хамаанданан оонньуу ыытылынна. Оонньууга биир идэлээхтэр учуутал идэтин историятыттан, биллииллээх педагогтар, уруогу ыытыы технологиялар о.д.а. туһунан араас ыйытыыларга хоруйдаатылар.
Бу 2023 сылы оскуолабыт оҕолоро, үлэһиттэрэ үөрэххэ, спорка, наукаҕа, үөрэх таһынан дьарыктарга үгүс ситиһиилэрдээх көрүстүлэр уонна ситиһии өссө да кэлэ туруо диэн түмүктүөхпүтүн баҕарабыт.
«Дьоҕур» пресс-киин, Кэбээйи орто оскуолата.