Профориентационнай үлэ чэрчитинэн Кэбээйи орто оскуолатыгар Дьокуускайдааҕы култуура уонна искусство коллеһын устудьуоннара ыалдьыттаатылар.
Кэбээйи оскуолатын выпускнига Кай Эверстов уонна Мэҥэ-Хаҥаластан төрүттээх Евдокия Нестерова бу күннэргэ нэһилиэкпитигэр үлэлии-хамсыы, айа-тута сылдьаллар. Кинилэр музыка, ырыа-тойук, үҥкүү эйгэтигэр ис сүрэхтэриттэн сыстаннар, олохтоох дьону, оҕолору кэрэ эйгэҕэ сыһыараллар.
Ол курдук, устудьуоннар быйылгы выпускниктара, 11 кылаастарга, бэйэлэрин колледжтарын туһунан олус интэриэһинэйдик кэпсээтилэр. «Күн өркөн» диэн үҥкүү ансаамбыл туһунан, ситиһиилэрин билиһиннэрдилэр.
Кинилэр талан ылбыт идэлэрин олус сөбүлүүллэрэ көһүннэ. Араас спектакыллары туруоран, дойду араас куораттарыгар кытталларын, сири-дойдуну көрөллөрүн тоһоҕолоон кэпсээтилэр.
Ол курдук, 9 кылаас кэнниттэн «Народное художественное творчество», 11 кылаас кэнниттэн «Музыкальное искусство эстрады», «Социально-культурная деятельность» диэн хайысхаларга туттарсан киириэххэ сөп.
Түмүккэ, өскөтүн эн ыллыыргын, үҥкүүлүүргүн уонна айар куттаах буоллаххына, бу үөрэххэ туттарсан киир, эдэр сааскын интэриэһинэйдик, бэһиэлэйдик, умнуллубаттык атаар диэн ыҥырдылар.
Аэлита Егорова, 11 кылаас,
«Дьоҕур» пресс-киин, Кэбээйи орто оскуолата.