Биһиги оскуолабытыгар сэтинньи ый 30 күнүттэн алтынньы 5 күнүгэр диэри «Учуутал, эн үрдүк ааккар сүгүрүйэн» диэн учууталларбытыгар аналлаах нэдиэлэ үөрүүлээхтик буолан ааста. Нэдиэлэ устата биһиги оҕолор уонна төрөппүттэр күндү учууталларбытыгар истиҥ тылларбытын, махталбытын, убаастабылбытын көрдөрдүбүт.
«Учуутал аныгы оҕо хараҕынан» диэн уруһуй быыстапкатыгар кыра кылаас оҕолоро учуутал идэтин хайдах көрөллөрүн уруһуйга түһэрдилэр. Маннык тэрээҺин оҕо айар дьоҕурун сайыннарар уонна учуутал үлэтин туһунан өйдөбүллэрин кэҥэтэр диэн бэлиэтээтилэр.
«Мин идэм — учуутал» диэн хаартысканан быыстапка оҕолор да, улахан да дьон болҕомтотун тарта. Учууталлар оҕо эрдэҕинээҕи, саҥа үлэлэлээн саҕалаабыт уонна идэлэрин сырдатар хаартыскаларын көрдөрөннөр, дьон-сэргэ сэҥээриитин ыллылар. Онон хаартыскаларга учуутал идэтин суолтата уонна уратыта арылынна.
Кыайыы 80 сылынан «Учуутал-снайпер» диэн бэрт сэргэх күрэххэ учууталлар хамаанданан арахсан, кыраҕы харахтаах учууталлары бэлиэтиир күрэхтэһии буолла. 2 чаас устата учууталлар күннээҕи түбүктэриттэн тэйэн, сыал ыттылар, кыайыы да, хотторуу да амтанын биллилэр.
Сылын аайы оскуолабытыгар үгэс олохтоммута. Ол курдук, 11 кылаастар бүтэҺик сылларыгар учууталларыгар анаан тэрээҺин ыытыахтаахтар диэн. Быйылгы выпускниктар түмсэн,»Музыкальнай лото» диэн олус сэргэх оонньууну кыайа-хото туттулар. Үөрэнээччилэр уонна учууталлар биэс сомоҕо хамаандаларга арахсан, бары көхтөөхтүк кытыннылар. ТэрээҺин саҕаланыыта оҕолор учууталлары аан боруогуттан ытыс тыаҺынан уонна бэлэхтээх көрүстүлэр уонна эҕэрдэ үҥкүүнэн арыйдылар. Оскуолабыт биир бастыҥ үөрэнээччилэрэ Айсен Егоров уонна Сандал Обутов оонньууну иилээн-саҕалаан ыыттылар. Айсен кыттааччылары кытта кэпсэтэн-ипсэтэн, күллэртээн, оонньууну өссө кэрэхсэттэ уонна сэргэх оҥордо. Балтараа чаас устата оҕолор, учууталлар араас сыллар ырыаларын таайан, ойон туран үҥкүүлээн, астыннылар, дуоҺуйдулар. Оонньуу быыҺыгар 11 «б» кылаас уолаттара учууталларга эҕэрдэ ырыа бэлэхтээтилэр. Түмүккэ 4 кыайыылаах таҕыста, бирииҺинэн наҕараадаланна.
Эмиэ бу күн үөрэнээччилэр учууталларыгар аһаҕас уруоктары ыыттылар. Учууталлар оҕо саастарыгар түҺэн, бэйэлэрин үөрэнээчилэр курдук сананан олус дуоһуйдулар. Айна Аргунова нуучча тылын, Сайаана Терехова, Валя Гуляева математиканы, Карина Обутова историяны, Алеша Сыроватскай физкультура уруоктарын ыыттылар. Манна бааллара: уруогу ыҺар да үөрэнээччилэр, хойутаан да киирээччилэр, бастыҥтан бастыҥ да үөрэнээччилэр. Оттон учуутал буолбут оҕолор бу күн учуутал үлэтин ыараханын эттэринэн-хааннарынан билэн, сөхтүлэр.
Өссө ордук тэрээҺининэн «Махтал» диэн акция буолла. Оскуола оҕолоро тапталлаах учууталларыгар бэйэлэрин махталларын биллэрэн, открытка оҥорон, минньигэс сакалаат бэлэхтээн, хас биирдии учуутал сүргэлэрин көтөхтүлэр. Оҕолорго эмиэ болҕомтоҕут иҺин махтал буолуохтун.
Маны таҺынан, нэдиэлэ устата кылаастар бастакы учууталларын уонна бэтэрээн-педагогтары кытта көрсүһүү тэрийдилэр. Кылаас чаастарга ааспыт сыллары санаан ыллылар, учуутал идэтин суолтатын уонна алгыс тылларын эттилэр. Сорох кылаастар бэтэрээннэргэ дьиэлэригэр тиийэн, хоҺоон аахтылар, ырыа ыллаан сэргэхситэн кэллилэр.
Чэппиэр күн оскуолабыт Профкома тэрийиитинэн учууталларга «Лабиринт» диэн оонньуу ыытылынна. Икки хамаанданан бэҺиэлэй этаптары ааҺан, учууталларбыт дуоҺуйа сынньаннылар.
Бээтиниссэ күн бары да күүппүт, оҕолор олус бэлэмнэммит эҕэрдэ кэнсиэрпит буолбута. 5-11 кылаас үөрэнээччилэрэ кыһаллан бэлэмнээбит кэнсиэрдэригэр араас ырыалары ыллаатылар, урукку кэми да санатар, аныгы да үҥкүү көрдөрөн, талааннарын арыйдылар, дохсун ытыс тыаҺынан заал иҺин толордулар.
Нэдиэлэбит Дублер күнүнэн түмүктэннэ. 11 кылаас оҕолоро учууталлыы дьоҺуннук туттан-хаптан, эппиэтинэҺи сүгэн, оскуоланы салайдылар. Директор Каролина Дьяконова бу күн сыалын ситиспитин, дублер-учууталлар эбээҺинэстэрин бары толорбуттарын, үөрэнээччилэр астыммыттарын бэлиэтээтилэр. Үөрэх чааҺын солбуйааччы кыргыттар бастыҥ уруоктаах учууталларга грамота туттардылар: Айна Аргуноваҕа, Дайаана Васильеваҕа уонна Алеша Сыроватскайга. Маладьыастар! Выпускниктар бары көмөлөөн, переменаларга аактовай саалаҕа көхтөөх оонньуулары ыыппыттарын эмиэ бэлиэтиэххэ наада. Бу күн уопсай линейканан түмүктэннэ. Директорыы иитии үлэтигэр сүбэҺит солбуйааччыта Андрей Максимов уонна дублер-учууталлар «Саарыннар суолларынан» бырагыраамма чэрчитинэн, М.А.Алексеев диэн республикаҕа суолталаах учуутал туҺунан оҕолорго сырдаттылар.
Онон, Учуутал күнүгэр аналлаах нэдиэлэбит бэрт сэргэхтик ааста. Күндү учууталларбытын өссө төгүл эҕэрдэлиибит уонна күн аайы билиини арыйар, сайдарга көмөлөһөр үлэҕитигэр махталбытын тиэрдэбит!
Виолетта Левина, 11 кылаас
«Дьоҕур» медиакиин, Кэбээйи орто оскуолата
(«Дьоҕур» медиакиин оҕолорун уонна Мария Павлова хаартыскаҕа, видеоҕа түҺэриилэрэ)