Балаҕан ыйын 27 күнүгэр Кэбээйи орто оскуолатыгар Саха Өрөспүүбүлүкэтин Судаарыстыбаннаһын күнүн бэлиэтиир үөрүүлээх тэрээһин буолан ааста. Бу күн оҕолор Саха буолалларынан киэн тутталларын, култуурабытын убаастыылларын, дойдубутугар эрэниилээх буолалларын көрдөрөр бэлиэ түгэн.
Оскуолабыт иһэ сарсыардаттан сахалыы төрүт доҕуһуоллаах фольклорнай ансаабылынан, учууталлары, оҕолору минньигэс алаадьыннан сылаастык көрүстэ.
Бу үөрүүлээх күнү бэлиэтиир линейка дойдубут былааҕын дьүһүннүүр сахалыы үҥкүүнэн киэргэтилиннэ.
Бэйэлэрин эҕэрдэ тылларын «Сахам сирэ» хоһоонунан быйылгы выпускник уолаттар ааҕан тиэртилэр, дойдуга эрэниилээх буоларга ыҥырдылар.
Директоры үөрэх чааһыгар солбуйааччы Терехова Е.И. бэйэтин аатыттан бука бары үөрэнээччилэри, учууталлары уонна ыалдьыттары бэлиэ күнүнэн эҕэрдэлээтэ, бииргэ өрөспүүбүлүкэбит инники кэскилин туһугар үлэлииргэ, саҥа ситиһиилэри олоххо киллэрэргэ үлэлиэххэ, үөрэниэххэ диэн ыҥырда.
Маны таһынан, «Мы — граждане России» бырайыакка олоҕуран, 14 саастарын туолбут оҕолорго паспорт туттарыыта буолбута. «Бастыҥнар хамсааһыннара» салаа эксперт-наставнига Павлова М.Е. үөрэнээччилэргэ эҕэрдэ тылын эттэ, паспорт хаҕын, значоктары туттарда. Оҕолор дойдубут туһугар кыһаллыахпыт, үөрэххэ-билиигэ тардыһыахпыт диэн андаҕар тылларын эттилэр.
Нэдиэлэ устата элбэх тэрээҺиннэр буолбуттара. Онно ыытыллыбыт күрэхтэр түмүктэринэн кылаастарга грамоталары уонна куруук барытыгар кыттар, сахалыы эйгэни тарҕатар кылаастарга анал махтал суруктары туттардылар, уопсай хаартыскаҕа түстүлэр.
Кэтэһиилээх тэрээһиммит улахан оһуохайынан түмүктэннэ.
Онон биһиги өрөспүүбүлүкэбит баай үгэстэрин, национальнай култууратын, Саха сиригэр олорор норуоттар доҕордоһууларын убаастыыбыт, улахаҥҥа уурабыт. Хас биирдиибититтэн, оҥорбут үлэбититтэн, хамсааһыннарбытыттан бөһүөлэкпит, улууспут, дойдубут кэлэр кэскилэ тутулуктааҕын өйдүүбүт. Саха буоларбытынан киэн туттарга, маннык бэлиэ күннэри өйдүү — убаастыы сылдьыахха диэн ыҥырабын.
Сайаана ТЕРЕХОВА, 11 кылаас, Кэбээйи орто оскуолата