Аныгы музыка эйгэтигэр кавер (эбэтэр кавер-версия) диэн тылы элбэхтик истэбит. Кавер диэн биллэр ырыаны үтүктэн эбэтэр уларытан ыллыылларын этэллэр. Аан дойду үрдүнэн бу көрүҥ олус тарҕаммыт, анаан кавер куонкурустара, түмсүүлэр тэриллэллэр.
Толорооччу соҕотох киһи эбэтэр бөлөх буолуон сөп. Гитараҕа, барабаҥҥа, синтезаторга оонньоон доҕуһуолланаллар.
Биир бөлөх ырыатын толорор кавер ырыаһыттары трибьют бөлөх диэн аатыыллар. Маны сэргэ ханна, хайдах ыллыылларынан көрөн, көрүҥнэргэ араартыыллар. Ол курдук, анаан сыбаайбаларга ыллыыр, онно барсар бытаан да, тэтимнээх да репертуардаах бөлөҕү веддинг-бэнд диэн ааттыыллар. Үҥкүүлүүргэ сөптөөх түргэн, биллэр, хит параадтарга киирэр ырыалары толорор бөлөхтер пати-бэнд диэн буолаллар. Джаз, лаундж ырыалары ыллыыр бөлөхтөрү фанкшен-бэнд диэн ааттыыллар.
Биһиэхэ, Саха сиригэр, кавер толорор ыччат элбээтэ. Инстаграмҥа анал бөлөхтөр арыллан, куонкурус тэрийэллэр, бэйэ-бэйэлэрин кытта алтыһаллар, билсиһэллэр. Кавер толорортон саҕалаан, ким эрэ кистэлэҥ талаана арыллар, ким эрэ сыанаҕа тахсартан куттанар санаатын аһарынар.
Сайаана Неустроева Дьокуусай куорат 31 №-дээх оскуолатын VIII «б» кылааһын үөрэнээччитэ. Кыра эрдэҕиттэн ыллыырын сөбүлүүр. II кылаастан саҕалаан «Виктория» эстрада оскуола-устуудьуйаҕа сылдьар.
Бастаан устуудьуйа оҕолорун кытта уопсай ыллаһар этим. Онтон улам сөбүлээн, ылларан, бэйэм ыллыыбын. Билигин Мэрайя Кэри, Кристина Агилера репертуардарыттан толоробун. Учууталым С.П. Олесов өйүүр, куруук сүбэ-ама биэрэр.
Мин ийэм өттүнэн эһэм В.В. Кузьмин – мелодист. Киниттэн бэриллибит быһыылаах, ырыа – мин эйгэм. Инникитин олохпун музыканы кытта сибээстиир баҕалаахпын. Москваҕа Гнесиннар ааттарынан музыка академиятыгар туттарсыам. Ол иһин сыал-сорук оҥостон, ырыанан сөбүлээн дьарыктанабын.
Кавер толороллорун интернеккэ, социальнай ситимнэргэ көрөөччүбүн. @faouziaofficial, @kimmygabriela толорууларын сэргиибин. Ааспыт сайын инстаграмҥа каверга куонкурус биллэрбиттэригэр, бэйэбин холонон көрөргө санаммытым. Билигин хит-парадтарга инники күөҥҥэ сылдьар, ыччат сөбүлээн истэр Shawn Mendes, Camila Cabello «Senorita» ырыаларын толорбутум. 22 тыһыынча киһи көрбүт этэ. Наһаа үөрбүтүм, сөхпүтүм. Онтон кынаттанан салҕыы кавердары устабын. Дьонум өйүүллэр, өйдүүллэр. «Кавер устабын», – диэн эрдэттэн этэбин уонна хоспор киирэн, кимиэхэ да мэһэйдээбэт курдук олоробун. Эдьийим төлөпүөнүгэр устабын, кини камерата миэнинээҕэр ордук. Устан бүттэхпинэ, дьонум көрөллөр, онтон «үчүгэй» диэн сыаналаатахтарына, инстаграмҥа таһаарабын.
Мин санаабар, социальнай ситимҥэ таһаарыы сыанаҕа тахсыы кэриэтэ. Элбэх дьон эйигин көрөр. Баҕар, ханнык эмэ талааннаах оҕо эмиэ ыллыан баҕарара буолуо эрээри, кыбыстан, кэмчиэрийэн устубат буолуон сөп. Миигин, атын оҕолору көрөн, эмиэ кавер устан холонуо. Ол иһин устаргар сирэйгин-хараххын, таҥаскын-сапкын көрүнэн, хоскун хомунан баран устуохтааххын, уопсай култуураны тутуһуохтааххын.
Ырыаһыт хайдах ыллыырын курдук үүт-үкчү ыллаабакка, тональнаһын үрдэтэн-намтатан, арыый ураты суоллаан толорууну ордук дии саныыбын. Онно эн таһымыҥ, уратыҥ көстөр.
Билигин ордук омук ырыаларын толоробун, ол эрээри сахалыы эмиэ ыллыыр баҕалаахпын. 2017 сыллаахха «Саха» көрдөрөр-иһитиннэрэр хампаанньа тэрийбит «Эн-сулускун» бырайыагар Дарья Лавровалыын «Сулустар» ырыанан кыттыбытым. Саха эстрадатыттан Өркөнү, Байбал Сэмэнэби, Дарья Лаврованы сөбүлээн истэбин, кинилэр ырыаларын ыллаан холонуом дии саныыбын.
Профессионал ырыаһыт буолуохпун баҕарабын. Сөбүлүүр дьарыгыҥ эн олоҕун суола буолара наһаа үчугэй дии саныыбын. Баҕа санаабын чугаһатар сыалтан кавер толоробун, эстрада устуудьуйатыгар дьарыктанабын, үөрэхпэр кыһаллабын, оскуолабар ыытыллар тэрээһиннэргэ көхтөөхтүк кыттабын.
МАРИЯ ИВАНОВА