Калачева Камила — Саха КВН «Мааркыс» хамаандатын биир тутаах оонньооччута. 2019 сыл алтынньытыгар региональнай лигаҕа “Мисс Квн” үрдүк аатын ылбыта. Кини Нам улууһун Хатыҥ-Арыы оскуолатын 8-с кылааһын үөрэнээччитэ. Билигин «Саха КВН» республиканскай лигатыгар кыттаары бэлэмнэнэ сылдьар.
Камила “Ылдьаа ыччаттара” уопсастыбаннай түмсүү чилиэнэ. Кини ордук “Саха КВН” оонньуутугар кыттарын сөбүлүүр. Номнуо улахан ситиһиилээх.
— Камила, эйигин чугас дьонуҥ ким диэн ааттыылларый?
— Калач дииллэр. Бастаан чугас доҕотторум итинник ааттаабыттара, билигин бары иннэ диэн ыҥыраллар.
— Тоҕо инник диэн ааттыылларый?
— Миигин бастаан “Айар кут Голливуд” лааҕырга итинник диэн сүрэхтээбиттэрэ. Баһаатайым, учууталым уонна салайааччым — Михаил Михайлович (Мисээкэ) ити ааты биэрбитэ.
— Хаһааҥҥыттан КВНынан дьарыктанаҕын?
— КВНы кытары иллэрээ сыл “Айар-Кут Голливуд” лааҕырга билсибитим. Ити дьарыкпын бырахпатаҕым уонна быраҕыам да суоҕа дии саныыбын. Билигин “Мааркыс” хамаандаҕа оонньуу сылдьабын.
— Хамаандаҕа хайдах киирбитин туһунан кыратык кэпсиэҥ дуо?
— Мин урут Нам 1-кы нүөмэрдээх оскуолатыгар үөрэнэр этим, Хатыҥ-Арыы оскуолатыгар киириэхпин олус баҕарар этим. Ити улахан баҕа санаам туолбута. “Айар-Кут Голливуд” лааҕырга бэйэбин КВН-ҥа үчүгэйдик көрдөрөммүн «Мааркыс» КВН хамаандатыгар талыллыбытым.
— КВН-ҥа оонньуур киһиэхэ ханнык хаачыстыбалар баар буолуохтаахтарый?
— Мин санаабар, кини бэйэтигэр эрэллээх, күүстээх санаалаах уонна сүрүнэ көрдөөх-нардаах, көрүдьүөстээх, нууччалыы эттэххэ, юмордаах буолуохтаах.
— Биһиги билэрбитинэн, «Мааркыс» хамаанда улуустааҕы түһүмэххэ 2-с миэстэни ылбыта. Эһиги онтон санааҕыт түспүтэ дуо? Эбэтэр төттөрүтүн кыайыыга дьулуур үөскээбитэ дуу?
— Биһиги төттөрүтүн кыайыыга өссө күүскэ кыһаллан барбыппыт. Иккис буолбуппутугар кыра кыһыы баара. Ол эрээри региональнайга биһиги хамаандабыт бастаабыта, онтон улууска бастаабыт Нам 2-с №-дээх оскуолатын хамаандата иккис буолбута. Бу күрэххэ уон хамаанда кыттыбыта. Муус устар 9 күнүгэр республиканскай түһүмэххэ бараары бэлэмнэнэ сылдьабыт.
— Эн сыанаҕа тахсыаҥ иннинэ төһө долгуйаҕын?
— Олус күүскэ долгуйбутум, тоҕо диэтэххэ бу мин хамаанда туһугар бастакы улахан сыанаҕа тахсыым этэ.
— “Мисс КВН” аатын ылбыккар төһө соһуйбуккунуй?
— Мин ааппын эппиттэригэр олус соһуйбутум. Бастаан долгуйаммын истибэккэ да хаалбытым. Ол эрээри испэр мин буолуом диэн эрэнэрим. Кыайбытым кэннэ бары миигин эҕэрдэлээн барбыттара. Бу түгэни хаһан да умнуом суоҕа.
Кэпсэттилэр: Сандаара Овчинникова, Нарыйаана Калачева