Буолаары турар күрэс төрүт көрүҥнэрин XXII-с «Манчаары оонньууларыгар» Үөһээ Бүлүү улууһун аатын чиэстээри сылдьар спортсменнартан биирдэстэрэ — Аян Чоросов. Кини Хотугу многоборье көрүҥүнэн дьарыктанар. Спортсмены кытта кэпсэтиибин ааҕааччыларга таһаарыахпын, кини туһунан сырдатыахпын баҕарабын.
Аян Дүллүкү нэһилиэгиттэн төрүттээх, онно орто оскуоланы бүтэрбитэ, физкультура учуутала идэлээх. Хотугу многоборьенан 2014 сылтан саҕалаан дьарыктанар. Хапсаҕайга тустуу маастара, убайа Егор Иванов сүбэтинэн Егор Егорович Васильевка дьарыктанан саҕалаабыт. Хотугу многоборьеҕа өрөспүүбүлүкэ хас да төгүллээх призерэ, муҥутуур кыайыылааҕа. Кини бу көрүҥҥэ — Арассыыйа спордун маастара, ону таһынан атах оонньуутугар маастарга кандидат, сүгэ быраҕыытыгар экс-рекорд олохтообута, «Аляскинский удар» күрэхтэһии рекордсмена, Федерация кубогын хас да төгүллээх муҥутуур кыайыылааҕа.
— Саамай өйгөр хатанан хаалбыт күрэҕиҥ туһунан кэпсиэҥ?
Россия чемпионатыгар 3 көрүҥ түмүгүнэн бастаан иһэммин, аркааммар тэбиллэн хаалан, 3-с миэстэ буолбуппун умнубаппын. Өссө Бүтүн Арассыыйатааҕы күрэхтэргэ хас да төгүл кыттан, призер буолбуппун күндүтүк саныыбын.
— Хотугу многоборье атын спорт көрүҥнэриттэн туох уратылааҕый?
Кыһын тымныыга таһырдьа сүүрэбит, ыстанабыт. Сүгэ уонна аркаан быраҕыы көрүҥнэрэ туспа искусство курдуктар. Сүрдээх ыарахан, өй-санаа өттүнэн уустук көрүҥ.
— «Манчаары оонньууларыгар» урут кыттыбытыҥ дуо? Күрэхтэһэ киирээри туран, бэйэҕин хайдах бэлэмниигин, турукка киллэрэҕин?
Урут иккитэ кытта сылдьыбытым да, биир да мэтээлим суох. Быйыл үһүс «Манчаарыбар» олус эрэнэбин. Дьарыгыҥ күүстээх буоллаҕына биирдэ турукка киирэҕин. Үчүгэйдик дьарыктаннаххына, бэйэҕэр эрэлиҥ күүстээх буолар.
— Билигин ханна, хайдах бэлэмнэнэ сылдьаҕын?
Мындаҕаайыга баарбын. Хайалаах Чурапчыга дьарыктана, айылҕаҕа сынньана сылдьабын.
Арай спорду дьарык оҥостубатаҕыҥ буоллар, туох дьарыктаах буолуоҥ этэй? Спортан ураты туох интэриэстээххиний?
Спордунан дьарыктамматаҕым буоллар, култуура эйгэтигэр барбыт буолуом этэ. Гитараҕа оонньуубун, ыллыыбын-туойабын.
— Бэйэҕин спортсмен быһыытынан 3 тылынан чопчу ойуулуоҥ дуо уонна саҥа саҕалыыр спортсменнарга тугу сүбэлиэҥ этэй?
Бэйэбин бэрээдэктээх, дьарыктаах уонна чиэһинэй киһинэн ааҕынабын. Оттон спордунан дьарыктаныан баҕалаах оҕолорго, бастатан туран, бэрээдэги тутуһуҥ диэн этиэхпин баҕарабын. Быһааран эттэххэ, утуйар хоскутун ыраастык тутартан саҕалаан эрдэ утуйан, күн аайы эрчиллиини эбэн, онтон күүстээх дьарыкка тиийиэххэ наада. Кыраттан саҕалаан тулуйан дьарыктаныҥ. Күрэхтэһиилэргэ кыттыҥ, хотторортон хаһан даҕаны толлумаҥ. Мин куттанарбын кыайбытым кэннэ, кыайыы кэлэр буолбута. 2-3 сылынан ситиһии кэлэрэ уустук, онон спортан тэйэн хаалбакка, тулуурдаахтык дьарыктаныҥ. Идэ гыммат буоллаххына, чөл олоҕу тутуһар киэбинэн, спортан тэйбэт ордук.
— Сиһилии кэпсээниҥ иһин махтанабын. Туох-ханнык үһүстээх, күрэс төрүт көрүҥнэрин XXII-с «Манчаары оонньууларыгар» ситиһиини, кыайыыны баҕарабын!
Кэпсэттэ Александра Иванова, 8 кылаас,
Дүллүкү, Үөһээ Бүлүү, «Эрчим» медиакиин