Муус устар 12-18 күннэригэр Дьокуускай куоракка физическай култуура предметигэр үөрэнээччилэр Бүтүн Арассыыйатааҕы олимпиадаларын түмүктүүр түһүмэҕэ буолан ааста.
Биһиги, «Кэскил» медиа оскуола юнкордара, бу улахан тэрээһини сырдатыыга оҕо пресс-киинигэр үлэлээтибит.
Физическай култуура предметигэр үөрэнээччилэр Бүтүн Арассыыйатааҕы олимпиадаларыгар Арассыыйа үрдүнэн мөлүөйүөнүнэн үөрэнээччи кыттыыны ылар. Ол курдук кинилэр бастаан оскуолаларыгар, салгыы олорор куораттарыгар, оройуоннарыгар, онтон регионнарыгар, өрөспүүбүлүкэлэригэр күрэхтэһэллэр. Дьэ онно кыайбыттар Арассыыйа үрдүнэн ыытыллар түмүктүүр түһүмэххэ кэлэн кытталлар.
Саха өрөспүүбүлүкэтэ 11 сыл буолан баран, быйыл иккис төгүлүн олимпиада түмүктүүр түһүмэҕин тэрийэн ыытта.
Быйылгы олимпиада Арассыыйа 81 регионуттан 292 кыттааччыны түмтэ. Түөрт күн устата Арассыыйа бастыҥтан бастыҥ үөрэнээччилэрэ араас уустук тургутуулары аастылар. Бастакы күн теоритическай түһүмэх ыытылынна. Кыттааччылар кэпсииллэринэн, 20 ыйытыылаах, ону таһынан 20-чэ боппуруостаах таайбараҥнаах. Ол аата кинилэр 45 мүнүүтэ устата 40-тан тахса ыйытыыга хоруйдуохтаахтар. Биирдии ыйытыыга мүнүүтэ эрэ курдук толкуйдуур бириэмэлээхтэр. Аны ыйытыылара олус уустук эбит. Физическай култуура көрүҥнэрин хайысхаларыттан саҕалаан, олимпиада кыттыылаахтарыгар, спорт көрүҥнэрин терминнэригэр тиийэ. Быйыл Улуу Кыайыы 80 сылынан сибээстээн, Аҕа дойду Улуу сэриитигэр кыттыбыт олимпийскай чемпионнар туһунан ыйытыылар эмиэ киирбиттэр. Аны сорудахтарын олимпиада саҕалыан иннинэ биэрэллэр. Ол иһин ханнык ыйытыылар кэлэллэрин эрдэттэн билбэт буолан, физическай култуураҕа сыһыаннааҕы барытын ааҕаллар. Олус киэҥ билиилээх-көрүүлээх буолуохтааххын.
Онтон салгыы үс күн устата гимнастикаҕа, баскетболга, чэпчэки атлетикаҕа, прикладной физкультураҕа күрэхтэстилэр.
Олимпиада олус кытаанах ирдэбиллээх. Кыттааччылары аралдьытыа суохтааххын. Ол иһин прессалары күрэхтэһиилэр буолар сирдэригэр киллэрбэттэр. Хата, олимпиаданы ыытар хамыыһыйа кылаабынай бэрэссэдээтэлэ, физическай култуураҕа Москватааҕы государственнай академия ректора Н.Н. Чесноков көҥүллээн бүтэһик күннэргэ биһигини киллэрбиттэрэ.
Олимпиада сорудахтара сылтан сыл уларыйан иһэллэр эбит. Быйыл прикладной физкультураҕа саҥа көрүҥ киирбит – быһаҕынан сыалы быраҕыы. Аны олимпиаданы ыытар регион олимпиада бэйэтин төрүт көрүҥнэрин киллэрэр бырааптаах. Онон Саха сирэ наартаны ыстаныыны киллэрбит. Кыттааччылар наартаны ыстаныы уустук көрүҥ диэн бэлиэтээн эттилэр.
Бу күннэр биһиэхэ, юнкордарга, олус интэриэһинэйдик аастылар. Арассыыйа араас регионнарыттан кэлбит оҕолору кытта билистибит, кэпсэттибит, кинилэр төтүт үгэстэрин, олорор сирдэрин уратыларын туһунан кэпсэттибит, видеолары уһуллубут, интервью, ыстатыйа суруйдубут. Бэйэбит олус элбэҕи биллибит. Оҕолор дойдуларын туһунан ыйытыыларга наһаа интэриэһинэйдик эппиэттииллэр, наһаа элбэҕи билэллэр, камераттан куттамматтар.
Пресс-кииҥҥэ үлэлээммин аҕыйах күн иһигэр уопут бөҕөтө ыллым, өй-санаа өтүнэн сайынным, билиим-көрүүм кэҥээтэ.
Алеся НИКОЛАЕВА, VIII «Г» кылаас,
17 №-дээх оскуола, Дьокуускай
***
Физическай култуура предметигэр үөрэнээччилэр Бүтүн Арассыыйатааҕы олимпиадаларын түмүктүүр түһүмэҕин сырдатыыга үлэлээммин элбэҕи биллим. Манна кыттыыны ыла кэлбит Арассыыйа араас регионнарын оҕолорун кытта билсэн, интервью ылан, ааҕааччыларга билиһиннэрдибит.
Олимпиада биир саамай умнуллубат түгэнинэн, олимпиада кыттыылаахтарын кытта саха режиссера Михаил Лукачевскай “Триумф” киинэтин көрбүппүт буолар. Атын регионтан кэлбит оҕолор наһаа сөбүлээтилэр. Киинэ ис хоһоонун толору өйдөөтүлэр. Киһини долгутар хас биирдии түгэҥҥэ ытыстарын таһына олордулар.
Киинэ иннинэ биһиги олимпийскай чемпиоммут Павел Павлович Пинигин оҕолору кытта көрүстэ. Кини: «Эһиги спордунан дьарыктанар дьоллоох оҕолоргут. Дойдугут туһугар ыалдьар бэриниилээх дьон буола үүнэн тахсыҥ», – диэн баҕа санаатын эппитэ.
Олохпор буолан ааспыт бастакы улахан сырдатар үлэбин хаһан да умнуом суоҕа. Биһиги манна үлэлээбит юнкордар Н.Е. Мордитнов-Амма Аччыгыйа аатынан «Кэскил» оҕо бэчээтин кыһатыгар улахан махталбытын тиэрдэбит.
Сандаара СЕМЁНОВА, VIII «Г» кылаас,
17 №-дээх оскуола, Дьокуускай