Балаҕан ыйын 20 күнүгэр Өрөспүүбүлүкэтээҕи лиссиэй-интэринээт көҕүлээһининэн «Күн» оҕо түмсүүтүн тэрээһинигэр куорат уон оскуолатыттан, Ньурба, Нам, Ус Алдан, Амма, Мэҥэ Хаҥалас, Чурапчы, Таатта улуустарыттан кэлэн кытыннылар. Биһиги, Покровскай 1 №-дээх оскуолатыттан Хаҥалас улууһун аатыттан уон буолан кытынныбыт.
Тэрээһин сүрүн сыала — хас биирдии саха оҕото төрөөбүт ийэ тылынан саҥаран, биир саастыылаахтарбытыгар ити өйдөбүлү тиэрдии, эйгэни кэҥэтии буолар. Ол сыалтан туох үлэни, тэрээһини ыытыахха, бырайыактары суруйуохха, былаанныахха сөбүй диэн кэпсэтистибит, дьүүллэстибит.
Бу тэрээһини лиссиэй-интэринээт дириэктэрэ И.И. Шамаев, иитэр үлэҕэ завуһа К.П. Романова, саха тылын учуутала С.А. Заровняева иилээн-саҕалаан ыыттылар. Тэрээһин кэмигэр Сахабыт сирин биллэр дьонун: биллэр спортсмен Николай Обоевы, “Үрдэл-2024” ырыа куонкуруһун кыайыылааҕа Аман Анхаровы, “Саха тыла-400” хамсааһынтан Алла Ноговицынаны кытта көрүстүбүт. Ыалдьыттар биһиги ыйытыыларбытыгар сиһилии эппиэттээтилэр, сүбэлээтилэр. Учуутал диэн үрдүк кэрдиискэ туруохтааҕын, учууталлар такайан, биһиги маннык олохпутугар ситиһиилэннибит диэн бэйэлэрин санааларын үллэһиннилэр. Саха тылын сайыннарарбытыгар, үлэлэһэрбитигэр, дойдубут инники сайдыыта биһигиттэн тутулуктааҕын эттилэр. Мин бэйэм ыалдьыттар бу этиилэригэр сөбүлэһэбин уонна сэргээтим.
Өрөспүүбүлүкэ араас улуустарыттан кэлбит оскуола, куорат оҕолоро бэйэлэрин сэргэх, ураты, сонун визиткаларын көрдөрдүлэр, кэпсээтилэр. Мин оскуолабар “Күн” оҕолор түмсүүлэрин салайааччыта буоларым быһыытынан, бэлэмнээбит визиткабытын көрдөрдүбүт. Гуманитарнай чинчийэр институт научнай үлэһитэ И.А. Данилов дойду үрдүнэн элбэх араас омук олорорун, хас биирдиилэрэ тус ийэ тыллаахтарын, сорох омук тыллара умнуллан хаалбытын туһунан этэн аһарда. Биһиги сахабыт тыла сайдыылаах олох кэмигэр сүтэн хаалбатын туһугар бары кыһаллыахтаахпыт, үлэлэһиэхтээхпит диэн эттэ.
“Күн” оҕо түмсүүтүгэр сылдьаммыт элбэх оҕолору кытта билистибит, сонун кэпсэтиилэри иһиттибит, бэйэбит санаабытын эттибит. Улууспутугар, оскуолабытыгар тиийэммит Ийэ тылбытыгар сыһыаннаах тэрээһиннэри ыытыахтаахпыт, “Күн” түмсүү оҕо тэрилтэтин элбэтиэхтээхпит, былааннаныахтаахпыт, биир санаалаах буолуохтаахпыт. Оччоҕо барытын кыайыахпыт дии саныыбын.
Өрөспүүбүлүкэтээҕи лиссиэй-интэринээт олус үчүгэй тэрээһини оҕолорго, учууталларга көҕүлээбитигэр махталбытын тиэрдэбит. Хас биирдии сылдьыбыт үөрэнээччи үөрэн-көтөн тарҕаста. Сыалбытын-сорукпутун өйдөөтүбүт, сахабыт тыла сүппэтин туһугар үлэлэһиэхтээхпит.
Сайаана Еремеева,
Покровскай куорат 1 №-дээх физика-математика хайысхалаах Х “А” кылааһын үөрэнээччитэ, Хаҥалас.
keskil14.ru