Валерия Петрова агро хайысхалаах Б.Н. Егоров аатынан Күндэйэ орто оскуолатын 11 кылааһын үөрэнээччитэ. Быйылгы «Инникигэ хардыы» научнай-практическай конференциятыгар тыа хаһаайыстыбатын хайысхатыгар эдэркээн чинчийээччи хаһыс да сылын ситиһиилээхтик кыттан, өр сыллаах үлэлэрэ үрдүктүк сыаналанан Саха өрөспүүбүлүкэтин академигын, учуонайын Афанасий Васильевич Чугунов анал стипендията ананна.
Валерия алын кылаастан саҕалаан билэр, үөрэтэр, чинчийэр үлэнэн дьарыктаммыта. Кыратыттан айылҕаҕа олус чугас. Оту-маһы, үөнү-көйүүрү, дьиэ кыылларын умсугуйан үөрэтэр. Үлэһит, дьаныардаах, дьоҕурдаах кыыс научнай-чинчийэр үлэнэн 9 сыл дьарыктанан кэллэ. Ордук тыа сирин олоҕун-дьаһаҕын, үлэтин-дьарыгын үөрэтэр.
Ол курдук, хас да сыл чинчийэн «Үөн-көйүүр тулалыыр эйгэҕэ ньыматыйыыта», «Эбии аһылык ынах үүтүн көрдөрүүтүгэр дьайыытын үөрэтии», «Сапропель — хортуоппуй үүнүүтүн үрдэтэр дьайыытын чинчийии», «Ньирэй толугурун (модьуунун) хараҥаччы отунан эмтээһин», «Сибиинньэни тыа сиригэр барыыстаахтык иитии» уо.д.а дириҥ ис хоһоонноох дакылааттары суруйан араас таһымнаах научнай-практическай конференцияларга кыттыыны ылар. Чинчийэр үлэлэрэ тыа хаһаайыстыбатын хайысхатынан өрөспүүбүлүкэҕэ, бүтүн Арассыыйаҕа биһирэнэллэр, лауреат уонна кыайыылаах үрдүк ааттарын ылар, Саха сирин тыатын хаһаайыстыбатын научнай-чинчийэр институт бочуоттаах грамотатынан, бирииһинэн хаста да наҕараадаламмыта.
Эдэр чинчийээччини үрдүк ситиһиитинэн эҕэрдэлиибит!
keskil14.ru