Олунньу 28 күнүгэр Борис Никифорович Егоров аатынан Күндэйэ орто оскуолатыгар «Уол оҕо уонна эһээ» диэн күрэх ыытыллыбыта.
Күрэхтэһии чэрчитинэн, ох саанан ытыыга үрдүк категориялаах тренер, Сунтаартан Нургуйаана Джуластановна Петрова, национлаьнай төрүт оҕунан ытыыга Сунаар улууһун сүүмэрдэммит хамнаадатын чилиэнэ Наталья Николаевна Федорова уонна үөрэнээччитэ Саина Семенова маастар-кылаас ыыттылар. Ох саа араастарын билиһиннэрдилэр.
Салгыы күрэхпит бүтэһик түһүмэҕэ саҕаламмыта. Уопсайа биэс оҕо уонна биэс эһээ кыттыбыта. Түһүмэхэ бастакы кэрдииһигэр куобах быһыылаах сыалы табыахтаах этилэр. Иккиһигэр сорудах ыараан биэрдэ – куһу табан түһэриэхтээхтэр, бүтэһигэр – тииҥи. Улахаттар булчут буоланнар, бэркэ таптылар. Кыралар син ыарырҕаттылар быһыылаах эрээри, хаалсыбатылар. Түмүккэ «Кыраҕа харахтаах, эрчимнээх илиилээх дьиэ кэргэн» номинацияны Айастаан эһэтин Егор Егорович Михайловы кытта 15 очколаах ыллылар.
Маастар-кылаас көрдөрө кэлбит ыалдьыттарбытыгар нэһилиэк баһылыга Иван Витальевич Константинов «Үтүөкээн дойдубут Үс Күндэйэ» Капитолина Хрисанфовна Степанова кинигэтин бэлэх туттарда. Тэрээһин бүтэһигэр кыттааччылартан ураты ыалдьыттар эмиэ ох саанан ытан көрбүттэрэ. Олус астыммыттара!
Карнелия ИСАГАЛИЕВА IX кылаас, Күндэйэ, Сунтаар