Олунньу ый 12 күнүгэр Сунтаар улууһун Күндэйэ нэһилиэгэр Саха Өрөспүүбүлүкэтин Бырабыыталыстыбатын 2024 сыллааҕы үлэтин отчуоттуур мунньаҕа буолла. Мунньахха 72 киһи кыттыыны ылла.
Отчуоту СӨ үбүн миниистрин э.т. Иван Иванович Алексеев салайааччылаах бөлөх оҥордо. Бөлөххө үөрэҕирии, социальнай харалта уонна үлэ министерствотын, «Мин урбааным» тэрилтэ, өрөспүүбүлүкэҕэ куттал суох буолуутун департаменын эппиэттээх үлэһиттэрэ кыттыыны ыллылар. Бырабыыталыстыба үлэһиттэрин кытта Сунтаарбыт улууһун баһылыгын экономикаҕа солбуйааччыта Борис Серафимович Васильев уонна улуус тэрилтэлэрин эппиэттээх үлэһиттэрэ сырыттылар.
Олохтоохтор Иван Иванович мэлдьи буоларын курдук олус сиһилии, чуолкайдык, былырыыҥҥы туруорсуулары туолууларын ырытан туран оҥорбут дакылаатыттан астыналларын биллэрдилэр. 12 киһи 30-ча ыйытыыны биэрдилэр. Ол курдук, уот төлөбүрэ, уматык сыаната, эмп-том, хамнас, тыа хаһаайыстыбатыгар сыһыаннаах о.д.а. ыйытыылары биэрдилэр. Ыйытыыларга сиһилии быһаарыы, толору хоруй бэрилиннэ. Сахабыт сирэ күнтэн күн сайдан иһэрин, Бастакы Президеммит Михаил Ефимович Николаев сүҥкэн үтүөтүн бэлиэтээн туран салгыы ситиһиилэри, баар кыһалҕалары, туруорсуулары эттилэр. Ол курдук, тыа сирин дьылҕата, сайдыыта киһини дьиксиннэрэр туруктааҕын чуолкайдык этэн туран:
- Тыа хаһаайыстыбатын салаатыгар өрөспүүбүлүкэ бюджетыттан үбүлээһини 15% тиэрдэри;
- Киһи-аймах сүрүн аһылыгын — килиэби астааччыларга, үүтү переработкалааччыларга уот төлөбүрүгэр чэпчэтиини эбэтэр туспа тарибы;
- Сунтаар улууһугар кииннээн бурдук тиэйэн аҕалар тэрилтэ сабыллыбытынан ыраахтан бурдугу аччыгый урбаанньыттар таһыналларыгар айан, тиэйии ороскуотугар эбии ороскуоту төлөһөргө;
- Орто оскуолабыт капитальнай өрөмүөнүн;
- Оскуолаларга, уһуйааннарга логопед наадатын;
- Аҕа дойдуну көмүскээччилэр сыллара биллэриллибитинэн тыа сирин эр дьонун доруобуйаларыгар болҕомтону ууран анал быраастар кэлэн тыа сиригэр эр дьон доруобуйаларын бэрэбиэркэлииллэригэр;
- Анал байыаннай дьайыы кыттыылаахтарын уонна ветераннарын туруорсууларынан олорор дьиэлэрин кииннэммит ититиигэ холбооһуҥҥа ОДьКХ сметата сиэрэ суох үрдүгүнэн, нэһилиэк бюджета хайдах да уйунар кыаҕа суоҕунан үрдүкү салалта өттүттэн боппуруоһу быһаарыыга көмө наадатын;
- Тыа хаһаайыстыбатынан дьарыктанааччылар социальнай көмүскэллээх буолалларын ситиһэргэ, туттарыллыбыт үүт харчыта календарнай сыл саҕаланыыта нэһилиэнньэҕэ тиийэрин хонтуруоллуурга, о.д.а. этиилэри туруорустулар.
Түмүккэ мунньах кыттыылаахтара бырабыыталыстыба үлэтин биһирииллэрин биллэрдилэр, салгыы ситиһиилэри баҕардылар.
Карнелия ИСАГАЛИЕВА
X кылаас, “Кун.ру” юнкора,
Б.Н. Егоров аатынан Күндэйэ орто уопсай үөрэхтээһин оскуолата,
Сунтаар улууһа