Быйыл ОГЭ, ЕГЭ туттарар оҕолорго улахан эппиэтинэс. Ону кытта долгуйуу, күүстээх бэлэмнэнии. Оҕо билиитин бэрэбиэркэлиир, сыаналыыр, тургутан көрөр бэрэбиэркэлэр (ВПР), контрольнай үлэлэр сыл аайы ыытыллаллар.
Аны түөрт ыйынан ЕГЭ бастакы экзаменнара саҕаланаллар. Биһигиттэн, XI кылаас сэттэ үөрэнээччититтэн, үс оҕо үрдүк үөрэххэ туттарсаары түөрт экзамены туттарыахпыт.
Кыргыттар үһүөн медицина өттүнэн бараары сылдьабыт. Онон бэлэмнэнии күүстээх. Онтон күн-дьыл ааһан иһэр.
Тохсунньу 24-25 күннэригэр 80-ча оҕо улууспут киинигэр Ытык Күөлгэ саҥа лиссиэйгэ мустан аастыбыт. Үөрэх үлэһиттэрин идэни үрдэтэр интитутун естественнай-научнай үөрэхтээһин кафедратын сэбиэдиссэйэ, ЕГЭ предметнэй хамыыһыйатын бэрэссэдээтэлэ Мария Прокопьевна Данилова консультацияларыгар сырыттыбыт.
Икки күн устата ыытыллыбыт эбии үөрэххэ X-XI кылаас үөрэнээччилэрэ экзамены хайдах туттарар туһунан кэпсэттибит, бэлэмнэннибит. Оҕолору кытта учууталлар тэҥҥэ үөрэннилэр.
Эбии үөрэх сарсыарда 10 чаастан киэһээ 16-18 чааска диэри буолбута. Учуутал бэйэтин идэтин сөбүлүүр, өйдөнүмтүө гына кэпсиир буолан, били, «дьоллоох киһи чаһыны көрбөт» диэбит курдук барыта биир тыынынан ааспыта.
Экзамен сорудахтарын барытын ырытан баран хайдах өссө эбии балл ыларга кэннигэр баар сорудахтары быһаарбыта, оҥорон көрдөрбүтэ. Икки күн устата билбиппин, истибиппин барытын сурунан, 30-тан тахса илиис буолбута. Мария Прокопьевнаҕа махтанабын.
Мин маннык улуустааҕы үөрэхтэргэ иккис сылбын сылдьабын. Х кылаастарга дьоллоох оҕо саас түгэннэригэр аһары охтубакка, үөрэхтэрин туһунан умнубакка, кыһаллан, билиилэрин хаҥатыахтара дии саныыбын.
Биология предметэ олус дириҥ, онон оҕо билиитэ киэҥ буолуохтаах.
Ангелина ДАНИЛОВА, XI кылаас,
В.И. Ленин аатынан Уолба орто оскуолата, Таатта