Ахсынньы 17 күнүгэр Хадаар нэһилиэгэр “Тускул” сынньалаҥ кииҥҥэ “Живые голоса ветеранов” диэн документальный киинэ көрдүрүүтэ буолан ааста. Бу киинэ Арассыыйа Президенин Гранын өйөбүлүнэн олоххо киирдэ. Киинэни Хадаар юнкор оҕолоро салайааччыларын, наставниктарын, учууталларын көмөлөрүнэн уһулан оҥорон таһаардылар. Киинэ премьератыгар нэһилиэкпит олохтоохторун таһынан Чурапчы гимназиятын, Хайахсыт оскуолатын юнкордара кэлэн сырдатыы үлэтин ыыттылар, суруйдулар, интервью ыллылар. Медиа хайысхата оҕолору биир санааҕа түмэр эбит диэн санааҕа кэллим.
Онтон мин эмиэ киинэ туһунан бэйэм санаабын кылгастык үллэстиэхпин баҕарабын. Киинэ, кырдьык, интэриэһинэй. Экран нөҥүө үтүө санаа бэриллэр. Үгүс түгэҥҥэ киһи уйадыйар, хараҕын уута кэлэр. Дойдубутугар буола турар анал байыаннай дьайыыларга Хадаарбыт эдэр дьонноро олохторун толук уурдулар. Кинилэр аны хаһан да эргиллибэттэр. Ол кинилэр ийэлэригэр наһаа да ыарахан…
Бу киинэҕэ сэрии тиэмэтэ көлүөнэлэри ситимниирин өйдөөн көрдүм. Аҕа дойду Улуу сэриитин ыар сылларын тулуйбут ытык кырдьаҕастарбыт кэпсээбиттэрин уйадыйа иһиттим. Кинилэр сэрии кэмигэр эрэйи көрбүт буоланнар, ыччаттара оннук эрэйи көрүөхтэрин баҕарбаттар. Ол эрээри сэрии диэн тыл биһиги олохпутугар эргийэн кэлэ турар…
Киинэҕэ сөбүлээн көрбүт чааһым – Наталья Дмитриевна Лукина күһүҥҥү айылҕа фонугар туран сэрии туһунан уонна сэргэ туһунан кэпсээнэ. Күһүҥҥү айылҕа сэрии тиэмэтин ордук улаханнык көрөөччүгэ тиэрдэр эбит дии санаатым.
Ол гынан баран ветераннар урукку олохторун туһунан кэпсииллэригэр кинилэр эдэр эрдэҕинээҕи хаартыскалара аҕыйах диэн көрдүм. Ветераннар туһунан документальный киинэҕэ кинилэр олохторун, үлэлэрин кэпсиир, көрдөрөр хаартыскалар уонна видеолар баар буолуохтаахтар диэн саныыбын.
Ханнык баҕарар үлэҕэ сыыһалар баар буолаллар. Онтон бу киинэ туох да куһаҕан суох. Олус интэриэһинэй. Киһини толкуйдатар. Хадаар орто оскуолатын медиа эйгэтин оҕолоро уонна үлэһиттэрэ олус кыһаллыбыттар.
Киинэни көрбүт оҕолор кырдьаҕас аймахтарынан киэҥ туттубуттара уонна кинилэри харыстыыр санаалара өссө күүһүрбүтэ буолуо дии саныыбын. Мин тус бэйэм юнкор оҕолор курдук кырдьаҕс дьоннору кытта кэпсэтэн, ааспыт олох историятын билиэхпин баҕардым. Итинник кэпсэтэрбин сөбүлүүбүн.
Мин санаабар, Хадаар юнкордара уһулбут киинэлэрэ элбэх киһиэхэ күүстээх өйдөбүлү хаалларбыта буолуо диэн эрэнэбин.
Виталий ОРЛОВ, IX кылаас,
С.Д. Флегонтов аатынан Хадаар орто оскуолата, Чурапчы