Бу дьыл муус устар 15 күнүгэр Тааттатааҕы Норуот айымньытын дьиэтигэр ырыаны гитара алыптаах дроҕоонунан доҕуһуоллатан оҕо чуор куолаһынан ыллаан чугдаарда, көмүс дорҕооннорун киэҥ сиргэ ыста. Ол курдук ырыалыын тэҥҥэ көтүөххүн, кини көстүбэт кылаатыгар олорсон дьоллоох биһиккэ – оҕо сааска төннүөххүн, эбэтэр кэрэ кэм – оҕо саас устун куруук айанныы туруоххун баҕардар кэрэ киэһэ буолан ааста.
Гитаранан ырыа улуустааҕы күрэххэ барыта 28 эдэркээн ырыаһыттар чуор куоластарын иһитиннэрдилэр, көрөөччүлэр болҕомтолорун тартылар.
Эдэркээн талааннары сөҕө махтайа сыаналаатылар Юрий Михайлович Платонов, ырыаһыт, ырыа айааччы, Федоров Роберт Робертович, «Сатабыл» оҕо айымньытын дьиэтин педагога, гитарнай студия салайааччыта, Светлана Васильевна Будикина, Тааттыныскай нэһилиэк ыччатын лидера, ырыаһыт.
Гитаранан ырыа улуустааҕы күрэххэ кытта кэлбит оҕолорго ситиһиилэри баҕаран туран бэйэтин эҕэрдэтин тиэртэ улуустааҕы үөрэхтээһин систематын идэлээх сойуустарын бэрэссэдээтэлэ, ырыа куттаах гитарист Прокопий Васильевич Борисов, саха эстрадатыгар элбэх ырыата хит буолан тарҕаммыт ырыаһыт, гитарист Юрий Платонов, эдэр, кэскиллээх гитарист Светлана Будикина.
Бу курдук хас да көлүөнэ алтыһыытын көрдөрөр гитара иэйиилээх дорҕоонун ситиминэн «Гитаранан ырыа» улуустааҕы күрэх үрдүк таһымҥа ааста.
Дьүүллүүр сүбэ кыраҕы хараҕынан көрөн, чуор кулгаахтарынан истэн, ырыа нарын намчы дорҕоонугар куустаран уустук быһаарыыны ылынан миэстэлэри үллэрдилэр:
Бастакы категорияҕа:
Гран-при үрдүк аатын ылла Лаура Апросимова, Баайаҕа орто оскуолатын 6 кылаас үөрэнээччитэ, салайааччы Саргылаана Илларионовна Дедюкина.
1 истиэпэннээх лауреат — Николь Петрова, Баайаҕа орто оскуолатын 6 кылаас үөрэнээччитэ, салайааччы Саргылаана Илларионовна Дедюкина.
2 истиэпэннээх лауреат — трио Вася Богданов, Алешак Татаринов, Иванна Тистяхова, “Сатабыл” оҕо айымньытын дьиэтин иитиллээччилэрэ, салайааччы Роберт Робертович Федоров.
3 истиэпэннээх лауреат — дуэт Айыллаана Попова, Симона Макарова, Дьохсоҕон орто оскуолатын 6 кылаас үөрэнээччилэрэ, салайааччы Петр Иванович Щукин.
Иккис категорияҕа:
Гран-при үрдүк аатын Вася Полускин, 11 кылаас уонна Коля Чехченнонов 10 кылаас, Тыараһа орто оскуолатын үөрэнээччилэрэ ыллылар, сал. Зинаида Васильевна Саввинова.
1 истиэпэннээх лауреат — “Эклипс” бөлөх Аммос Анисимов, Селена Большакова, Нина Турнина, Диана Павлова, Снежана Петрова, Ытык-Күөл 1 нүөмэрдээх орто оскуолата, салайааччы Станислав Семенович Салгынов.
2 истиэпэннээх лауреат — Вика Попова, Дариана Захарова, Сардаана Степанова, Дьохсоҕон орто оскуолатын 10 кылаас үөрэнээччилэрэ, салайааччы Петр Иванович Щукин.
3 истиэпэннээх лауреат — Данил Иванов, Баайаҕа орто оскуолатын 10 кылаас үөрэнээччитэ, салайааччы Афанасий Никитин.
“Көрөөччүлэр биһирэбиллэрэ” анал бирииһи ыллылар “Эклипс” бөлөх Ытык-Күөл 1 нүөмэрдээх орто оскуолата, салайааччы Станислав Семенович Салгынов.
“Бастыҥ композиция” анал ааты ыллылар Оҕо ускуустубатын оскуолата, салайааччы Василий Прокопьевич Павлов.
Ханнык баҕарар көлүөнэни түмэр аналлаах, олоҕу ырыаны кытта ыкса ситимниир, кэрэ иэйиини бэлэхтиир гитара угуйар дорҕооно үйэлэргэ сүппэтин. Кэлэр кэнчээри ыччаппыт тыыннаах дорҕоону өрө тутан, олоххор аргыс оҥостон, сырдыкка талаһан үөрүүнү үксэт!
Роберт Федоров, «Дебют» түмсүү салайааччыта,
Тааттатааҕы «Сатабыл» оҕо айымньытын дьиэтэ.