Күһүҥҥү ас-үөл дьаарбаҥката — тыа сиригэр биир саамай кэтэһиилээх, илгэлээх бырааһынньык. Дүллүкү орто оскуолатыгар сыллата ыытыллар атыы-дьаарбаҥка быйыл эмиэ көхтөөхтүк барда.
Оҕолор төрөппүттэрин кытта эрдэттэн бэлэмнэнэн, бииргэ астаан, булка сылдьан, тыаҕа отонноон киэргэтэн аҕалан атыыга туруордулар. Туох суоҕуй манна? Оҕуруот аһыттан саҕалаан куска, куобахха, балык арааһыгар тиийэ барыта баар!
Биһиги дьаарбаҥкаҕа кытта кэлбит дьону кытта кэпсэттибит.
Александра Михайловна Чомчоева, төрөппүт:
— Сылsy аайы ыытыллар күһүҥҥү дьаарбаҥка быйыл эмиэ олус тэрээһиннээхтик ааста. Төрөппүттэр ас бөҕө астаабыттар. Биһиги дьиэ кэргэн элбэҕи атыыластыбыт. Маннык күн сыллата ыытыллара дьоһуннаах.
Сема Тобохов, 5 кылаас:
— Сайын үүннэрбит оҕурсуларбытыттан саамай улаханын аҕаллым. Элбэх оҕо куонкуруска кытынна. Дьаарбаҥка биһиэхэ – үөрүүлээх бырааһынньык курдук.
Оттон 6 кылаас үөрэнээччитэ Саша Софронов аҕата уонна эһэтэ илимнээбит соболорун аҕалан атыылаабытын туһунан кэпсээтэ.
4 кылаастар бастакынан астарын барытын атыылаан бүтэрдилэр. Киирбит харчы кылаас туһатыгар туттуллуо. Дьаарбаҥкаҕа кэлбит оҕо, улахан дьон бары илии тутуурдаах үөрэ-көтө тарҕастылар. Күһүҥҥү тэрээһин оҕону, төрөппүтү уонна учууталы биир сыалга- сорукка түмэн, биир мааны күнү бэлэхтээтэ. Күһүҥҥү киһи күлбүтүнэн диэн маны эттэхтэрэ!
Сааскыйа Васильева, X кылаас, «Эрчим» медиа киин, Дүллүкү, Үөһээ Бүлүү
Дьаарбаҥка туһунан сиһилии бу видеоҕа көрүҥ: