Саамай кэтэһиилээх кэммит, самаан сайыммыт, номнуо ортолоото. Тымныы уһун кыһын устата ыра гыммыт баҕабытын толорон, күөх сайыны ким күүлэйдии айаннаан, ким лааҕырга сылдьан, ким үлэҕэ киирэн араастык атаарабыт.
Быйылгы сайыммыт биһиэхэ Орто Халымаҕа олус тымныы, ардахтаах. Онон оҕуруокка, теплицаҕа үүнээйигэ мөлтөх сайын буолла. Оттон айылҕа бэлэҕэ тэллэй дьэ үүннэ аҕай. Сир кулгааҕа, шампиньон бэркэ үүннэ. Мин ийэбинээн тэллэйдиибит, кыһыҥҥыга хаһаанабыт. Ардахтаах буолан, үрэххэ балык баар. Аҕабытын кытта мотуорунан баран, балыктыыбыт.
Оттон оскуолам оҕолоро, бииргэ үөрэнэр доҕотторум сайыннарын хайдах атааралларын маннык кэпсииллэр:
Люба Еремеева, 9 кылаас: «Мин бэс ыйын бүтэһик күннэриттэн сылгы собуотун үүт табаарынай ферматыгар ыанньыксыт көмөлөһөөччүтүнэн үлэлээтим. Миигин кытта Сайаана Созонова эмиэ үлэлиир. Үлэбит сарсыарда алтаттан саҕаланар. Күҥҥэ иккитэ ыыбыт. Мин 16, Сайаана 14 ынахтаахпыт. Күҥҥэ 100 киилэ үүтү ыыбыт. Бастаан сатаабат буолан, ыарырҕаппытым, билигин сатаатым, онон үлэбин сөбүлээтим».
Ангелина Тихонова, 10 кылаас: «Мин Аллараа Бэстээххэ «3D fox» диэн лааҕырга баһаатай көмөлөһөөччүтүнэн үлэлиибин. Бу иннинэ икки сыл бу лааҕырга бэйэм сынньыммытым. Манна оҕолору аангылыйа тылыгар, аныгы үҥкүүгэ, гитараҕа уонна укулелеҕа оонньуурга үөрэтэллэр. Лааҕырга Саха сирин араас муннуктарыттан 100-чэ оҕо сынньанар. Лааҕырбыт туспа уопсайдаах, күҥҥэ 5-тэ тото-хана аһаталлар. Үлэбитигэр оҕолорго араас тэрээһиннэри, аралдьытыылары, оонньуулары бэлэмниибит, бэрээдэктэрин хонтуруоллуубут. Инники идэбин педагог быһыытынан былаанныыбын, ол иһин бу үлэм туһалаах буолуо дии саныыбын».
Регина Колесова, 11 кылаас: «Мин ааспыт үөрэх кэмигэр тэйиччиттэн баһаатай идэтигэр үөрэнэн анал докумуон ылбытым. Ол иһин бу сайын бөһүөлэкпэр оскуолаҕа аһыллыбыт «Кэнчээри» күнүскү лааҕырга баһаатай көмөлөһөөччүтүнэн үлэлиибин. Лааҕырбытыгар 25 оҕо сылдьар. Оҕолору икки хамаандаҕа араартаан күн аайы араас күрэхтэһиилэри, оонньуулары тэрийэбит. Сарсыардабытын хамсаныылаах оонньуулартан, эти-хааны уһугуннарар сэрээккэттэн саҕалыыбыт. Күн иккис аҥарыттан интэриэһинэй экскурциялары, көрсүһүүлэри оҥоробут. Дойдубут туһалаах, эмтээх отторун хомуйабыт, оҕуруокка үлэлиибит. Инникибитигэр да араас тэрээһиннэри былаанныыбыт. Үлэбин сөбүлээтим».
62 ньирэйи көрөөччү Арсений Татаринов
Оттон уолаттар ыраах сайылыктарга үлэлии барбыттар.
Ол курдук, Спира Винокуров былырыын сайылаабыт Чоҥкуйа учаастагар, оттон Дьулустаан Кириллов Тоҥуулаах учаастагар сылгыһыт көмөлөһөөччүлэринэн сайылыы барбыттар. Кинилэр онно сылгыны бырдахтан көмүскүүр түптэни оттоллор, сылгы хаһаатын ыраастыыллар, сылгылары көрөллөр-истэллэр. Уолаттар хаһыс да сылын маннык үлэҕэ сылдьар буолан уопутурбуттара саарбаҕа суох. Эр киһи ыарахан хара үлэттэн толлубакка, хаһыс да сылларын үлэлии бараллар.
Үһүс сылын үүт астыыр сыахха үүт тутааччыга көмөлөһөөччүнэн Стас Кудрин үлэлиир. Кини ыанньыксыттартан үүт тутар, туппут үүтүн эрийэн сүөгэйдиир, арыылыыр. Стас хаһыс да сылын үлэлиир буолан, туох-ханнык буолуохтааҕын билэр, сатыыр. Онон олох ыарырҕаппат, муммат-тэммэт. Настаабынньыгын солбуйуон да сөп.
Эрхан Созонов аҕатынаан тутууга үлэлиир. Кини аҕата Павел Гаврилович саҥа тутуллар фермаҕа үлэһиттэр дьиэлэрин тутууга үлэлиир. Эрхан онно араас үлэҕэ аҕатыгар илии-атах буолан көмөлөһөр, күн солото суох. Кини маннык сылдьан тутуу сатабылыгар үөрэнэрин саарбахтаабаппын.
Улахаттартан итэҕэһэ суох, 5 кылааһы бүтэрбит Сережа Макаров иккис сылын «курьердыыр». Кини велосипедынан, сороҕор сатыы да сылдьан, удамыр сыанаҕа тиэрдэн, аҕалан, атыылаһан, илдьэн биэрэн, олохтоох нэһилиэнньэҕэ олус туһалаах киһи буолар. Солото суох, ыксал кэмҥэ, сорох сылдьынар кыаҕа суох да дьоҥҥо, кини бэрт түргэнник кэлэ-бара охсон, наадаларын толуйар.
Онон үтүө сайыны оҕолор олус туһалаахтык атаарабыт. Үлэлиибит, туһалыыбыт, улаатабыт, сайдабыт, сатабылга үөрэнэбит, олус-олус үөрэбит.
Элеонора Сухомясова, 9 кылаас үөрэнээччитэ,
Орто Халыма, Өлөөкө-Күөл б.
keskil14.ru