Атырдьах ыйын 16-17 күннэригэр иккис төгүлүн ыытыллар «Түмэр түгэн» ыччат бэстибээлэ Күөх Ньурба сиригэр-уотугар улахан таһымҥа буолан ааста.
Бастакы күн Ил Дархан Айсен Сергеевич Николевы көрсөн, тэрээһин үөрүүлээх аһыллыыта саҕаламмыта. Салҕыы былаһааккаларынан икки чаастаах кэпсэтиилэр буолбуттара, ол курдук: үөрэх, култуура, успуорт, НКО, волонтёрство, урбаан уонна медиа хайысхаларга. Манна өрөспүүбүлүкэбит биллэр-көстөр дьоно кэлэн спикердаабыттара.
Эбиэт кэннэ урбаанньыттар, кырыымпа уонна уустар маастар-кылаастара ааспыттара. Киэһэ өттүгэр «пеннай вечеринка» уонна эстрадабыт чаҕылхай сулустарын Умсуура, Аскалон Павлов, Эрхаан, Лэгэнтэй кэнсиэрдэрэ элбэх дьону хомуйан бастакы күн түмүктэммитэ.
Иккис күн Георгий Русланович Балакшин зарядкатыттан саҕаламмыта. «Ньурба оройуонун 2027 сылга дылы сайдыыта» диэн сессия ыытыллыбыта. Эбиэт кэннэ хамаандалар, ону кытта эдэр учууталлар визиткалара, «Түмэр түгэн Кэрэ Куота», «Түмэр түгэн Уолана» буолбута. Манна кыайыылаахтарынан Хаарчаана Семёнова (Үөһээ Бүлүү) уонна Петр Давыдов (Ньурба оройуонун Чуукаар нэһилилиэгэ) ааттаммыттара. Ол кэннэ бэстибээл сабыллыыта, түмүктэр тахсыбыттара.
Киэһэ Аскалонидзе уонна Слава Жирков ыытааччылардаах кэтэһиилээх кэнсиэр ааспыта. Артыыстар Инвент, Аман Анхаров, Тыас-Уус, Флоу, Китджа, Моисей Кобяков, Максим Дмитриев дьон сүргэтин көтөхпүттэрэ. Диджейдар Ашими уонна Драматика уоттаах-күөстээх дискотека ыыппыттарынан иккис күн өрө күүрүүлээхтик түмүктэммитэ.
Ити курдук, «Түмэр түгэн» ыччат бэстибээлэ Сахабыт сирин араас муннуктарыттан эдэр ыччаты түмэн, «Зёма» ыччат хамсааһынын оҕолоро кэлэн, Ньурба куорат олохтоохторун үөрдэн ураты тэрээһин буолла.
Бэйэм бу икки күн волонтёрдаан үөрүүм үгүс, икки эрэ күн буолбакка, туох баар тэрээһин үлэтигэр отут оҕо буолан үлэлэстибит. Тэрийээччилэргэ, бэйэбит салайааччыларбытыгар, ыалдьыттарга, кыттааччыларга улахан-улахан махтал.
Анжелина ЖДАНОВА, Х кылаас.
Хаҥалас, Ньурба.
«Ыллык» эдкорпост.