Тохсунньу 26-31 күннэригэр республикатааҕы «Бэс Чагда» оҕо аймах сөбүлээн сылдьар лааҕырыгар «Кэскил» хаһыаппыт үлэһиттэрэ тэрийиитинэн «Мы едины» — «Биир сомоҕо» медиасмена буолан ааста. Мин онно сэттэ көхтөөх күннэрбин атаардым. Наһаа астына, дуоһуйа сырыттым. Элбэх оҕолору кытта билистим, доҕордостум.
Лааҕырга араас ыҥырыылаах ыалдьыттары кытары көрсөн сэһэргэстибит. Сменабыт иккис күнүгэр «Саха» НКИХ биир чаҕылхай ыытааччыта Георгий Белоусовы кытта көрүстүбүт. Георгий Белоусов бэйэтин үлэтин, хайдах саҕалаабытын, оҕо эрдэҕинэ юнкордаабытын туһунан биһиэхэ кэпсээтэ.
Оҕолор араас ыйытыылары биэрдилэр, онтон мин маннык ыйытыы биэрдим: «Үлэҕэр биирдэ эмэ туохха эмит сыыспытыҥ дуо? Ханнык саамай күлүүлээх түгэҥҥин кэпсиэххин сөбүй?». Георгий Александрович ыйытыыбар махтанан баран маннык диэн хоруйдаата: «Ким үлэлээбэт, ол сыыспат. Тугу да үлэлээбэт киһи кырдьык туохха да сыыспат буоллаҕа дии. Онтон үлэлиир, суруйар киһи сыыһар, кыра алҕаһы оҥорор. Ол курдук миэхэ эмиэ биллэн турар баар буолуохтаахтар инник түгэннэр. Улахан күлүүлээх түгэним миэхэ суох, ол эрэн мин эһиэхэ араадьыйаҕа үлэлээбит кэммэр буолбут түгэннэрбин кэпсээн ылыым. Араадьыйаҕа сороҕор сахалыы шрифт суох буолааччы. Биирдэ саҥа үлэлии киирбит холонооччу кыыс кэлэн баран маннык диэн этэр: «Күндү истээччилэр, билигин биһиги араадьыйабыт долгунугар Байбал Сэмэнэп «Уоруу» диэн ырыатын истиэҕиҥ» — диир. Ону биһиги наһаа соһуйдубут. «Үөрүү» диэн ырыаны «Уоруу» диэн кэбиспит, сахалыы шрифт оччолорго суох буоллаҕа дии. Сөп, аны туран буоллаҕына эмиэ ол араадьыйаҕа үлэлии сырыттахпына, «Кэскил» хаһыаттан матырыйааллары аҕаллылар, сонун бөҕөнү кэпсээри. Онно «Азия оҕолоро» күрэхтэһииттэн ыстатыйаҕа маннык диэн этии баар: «Саха сирин хамаандатын оҕолоро волейболга кыайан-хотон көрөөччүлэригэр эбии үөрүүнү бэлэхтээтилэр», дьэ бу маны саҥа кэлбит кыыска аах диэтим, араадьыйа эфирэ бара турар, кини маннык аахта: «Саха сирин хамаандатын оҕолоро волейболга кыайан, хотон көрөөччүлэригэр эбии үөрүүнү бэлэхтээтилэр» интонация диэнэ иннэ сытар, кини хотон эрэ көрөөччүлэрэ эбии үөрүүнү ылбыттар диэн өйдөнөр гына ааҕан кэбистэҕэ дии. Дьэ инник курдук сыыһалар, көрдөөх түгэннэри көрсүбүттээхпин үлэбэр».
Бу курдук күөх экраҥҥа эрэ көрөр суруналыыспытын илэ көрөн, атах тэпсэн олорон кэпсэтэр дьоллоннубут.
Алёна ТАППЫРОВА, Уолба орто оскуолатын VIII үөрэнээччитэ, Таатта.
keskil14.ru