Алексей Елисеевич Кулаковскай-Өксөкүлээх Өлөксөй «Оттоку олук алгыһа» айымньы туһунан А.Е. Мординов аатынан Таатта лиссиэйин оҕолоро санааларын үллэстэллэр.
***
Саша Герасимов, 11 кылаас:
Таас дьиэҕэ сытаммын
Унньуулабын ахтабын,
Хом санааны хоннорбот
Ыра санаабын ситээри.
Утуйар уу минньигэс,
Кистэлэҥнээх түүллэри
Бэйэбэр тутан хаалабын,
Көччөх гына көтүтэбин.
Сэргээммин үтүө алгыһы
Аахтым астык кинигэттэн,
Ааттаах айымньыны
“Оттоку олук алгыһын”.
Быйыл оскуоланы бүтэрэр
Тиритэр-хорутар тургутуу,
Алгыс баһа сыаланнын,
Айымньым туһалаатын.
Виктория Габышева 8 «б» кылаас:-А.Е. Кулаковскай-Өксөкүлээх Өлөксөй айар тыл аҕата мин биир дойдулааҕым буолар. «Оттоку олук алгыһа» диэн хоһоонун сөбүлээн ааҕабын. Бу айымньыны дьиэ кэргэн дьоллоох буоларын туһугар ис сүрэҕиттэн кыһаллан Тааттаҕа олорон суруйбут. Нуучча ньургунун кытта туруулаһан, Арассыыйаҕа эйэлээхтик олорон, сахалар өй-санаа чыпчаалын ситиһэргэ кыһаллыахтаахпыт. Кини хоһоон нөҥүө эдэр ыччат олоххо суолун булунарыгар алгыс тылын этэр. Өйдөөх, булугас, араас омугу кытта тэҥҥэ үөрэнэн, билэн-көрөн, төрөөбүт дойдубут сайдыытыгар кыһаллар дьон буолуохтаахпытын ааптар ыйан-кэрдэн, сүбэлээн биэрэр.
Степан Потапов, VIII «Б» кылаас: — Өксөкүлээх Өлөксөй “Оттоку олук алгыһа” хоһоонун ааҕан бараммын санааҕа ыллардым. Кини айар тыл аҕата оччоттон баччаҕа диэри сытыытык турар кыһалҕалары киэр кыйдаан, алгыс көмөтүнэн барыта этэҥҥэ буоларын быһаарбыт.Ити хоһоонун мин остуолга уура сылдьан ааҕар эбиппин диэн санааҕа кэллим. Бачча бэлэмҥэ олорон, саатар биир үчүгэй хоһоону суруйбат эбиппин. Кини ыарахан олохтоох эрээри, биһиэхэ үтүөнү баҕарар муударай суруйааччы. Билиҥҥи кэми өтө көрбүт ойуун курдук киһи. Ынаҕы-сүөһүнү дэлэтэн, тыа хаһаайыстыбатын сайыннарарга сүрүн сыалбын-сорукпун туруордум. Ынах этин сии олорор, үчүгэй дии. Ол иһин бу айымньы нөҥүө сүөһү ииттинэр дьиэ кэргэҥҥэ улааппыт буолан, саамай сөпкө эппит диэн бигэргэтэбин. Уһун олохтоох, элбэх сүөһүлээх киһи буолуоҕум.
Сандаман Баай Кут, 8 «Б» кылаас: — Өлөксөй төрөөбүт алааһыгар сылдьыбытым. Илэ харахпынан көрбүтүм, муннубунан кини тыыммыт салгынынан эҕирийбитим. «Оттоку олук алгыһа» айымньы дириҥ ис хоһоонноох . Айылҕаттан күүс-уох ылбыта чуолкай. Айылҕалыын алтыһан маннык күүстээх санаалаах буоллаҕа. Киһиэхэ төрөөбүт дойдута санаатын күүһүгэр эрэли биэрэн, алгыс көмөтүнэн норуотугар, ыччатыгар үтүөнү баҕарбыт.