Биһиги Таркаайыбыт нэһилиэгэ үгүс үтүө, туруу үлэһит дьонунан биллэр. Олортон биир ытык киһибитинэн РСФСР норуотун үөрэҕириитин туйгуна, Саха Өрөспүүбүлүкэтин үтүөлээх учуутала, педагогическай үлэ бэтэрээнэ, Ньурба оройуонун «Бастыҥ дириэктэр» бэлиэ хаһаайына, Таркаайы нэһилиэгин уонна Ньурба оройуонун бочуоттаах олохтооҕо Иван Николаевич Иннокентьев буолар.
Кини 1944 сыллаахха алтынньы 1 күнүгэр Ньурба оройуонун Хорула нэһилиэгин Дьаархан күөлүн Чиллэ үрэх үрдүгэр баар кыракый алааска төрөөбүтэ. Олоҕун тухары төрөөбүт сирин сайдыытыгар, кэлэр көлүөнэ кэскилигэр сүдү кылааты киллэрбит дьиҥнээх чулуу үлэһит киһинэн биллэр.
Иван Николаевич олоҕун үгүс кэмин үөрэх эйгэтигэр анаабыта. Идэтинэн математика учуутала, 40-ча сыл устата Марха орто оскуолатыгар оҕолору билиигэ уһуйбута. Кини уустук математиканы судургутук быһаарар, оҕолордуун чугастык алтыһар талааннаах учуутал. Ол эрэн, кини үлэтэ учууталлыырынан эрэ муҥурдамматаҕа: 23 сыл устата Марха орто оскуолатын директорынан таһаарыылаахтык үлэлээн, иллээх уонна үлэһит педколлективы түмэн, кэскиллээх бырайыактары олоххо киллэрбитэ.
Кини салайыытынан Марха оскуолата саҥа таһымҥа тахсыбыта. Улууска биһиги нэһилиэккэ биир бастакынан саҥа таас оскуола дьиэтэ тутуллубута — бу Иван Николаевич кэлэр көлүөнэ туһугар кыһаллар чулуу киһи буоларын чаҕылхай туоһута. Саҥа оскуолаҕа оҕолорго үөрэххэ үчүгэй усулуобуйаны тэрийэн, элбэх эдэр ыччакка сырдык суолу арыйбыта.
Иван Николаевич үлэтэ-хамнаһа судаарыстыба, оройуон, нэһилиэк өттүттэн үрдүктүк сыаналаммыта. Иван Николаевич Иннокентьев — кырдьык да, биһиги нэһилиэкпит ытык киһитэ, кэлэр көлүөнэҕэ үлэһит буолуу холобурун көрдөрөр туруу үлэһит киһи. Кини үлэтэ олоххо бэриниилээх, дьулуурдаах уонна үлэһит буолуу холобурун көрдөр.
Биһиги, үөрэнээччилэр, кининэн киэн туттабыт, баҕарабыт ытыктыыр киһибитигэр саха алмааһын курдук кытаанах доруобуйаны уонна уһун дьоллоох олоҕу!
Александр Федоров, «Уткин сонуннара» медиакиин юнкора,
Марха орто оскуолата, Ньурба.
keskil14.ru