Биһиги Уус Алдан улууһугар саха норуотун поэта, оҕо суруйааччыта Иван Васильевич Мигалкин төрөөбүтэ 70 сааһыгар аналлаах тэрээһиннэригэр элбэх оҕону, учууталлары кытта алтыһан аастыбыт. Ол туһунан эһиэхэ кэпсиэхпитин баҕарабыт.
***
Айнаара Дьяконова Мүрү 1 №-дээх орто оскуолатыгар үөрэнэр. “Сардааналаах кыысчаан” уруһуй күрэҕэр кыттыыны ылла. Иван Васильевич “Кутуйах уонна куоска” остуоруйатын ааҕан баран, уруһуйдаабыт. Күрэххэ аан бастаан кыттар буолан, долгуйбут. Уруһуйдаан баран ону дьон иннигэр тахсан кэпсиир киниэхэ элбэх уопуту биэрбит. Маладьыас, Айнаара! Иннин хоту баран ис!
***
Луиза Третьякова Мындааба спорт оскуолатыттан сылдьар. 10 саастаах. Иван Мигалкин саhылчаан уонна кини доҕотторун туһунан остуоруйаны бастаан аахпыт уонна уруһуйдаабыт. Остуоруйа ис хоһоонун арыйарыгар сырдык өҥнөрү элбэхтик туһаммыт. Тулалыыр дьоҥҥун сырдыкка, кэрэҕэ угуйа тур, Луиза!
***
Ангелина Парникова Сыырдаах орто оскуолатын үөрэнээччитэ. Кини күрэхтэргэ хаста да кыттыбыт. Онон уопуттаах эбит. Ол иһин долгуйбатах.
Куобаҕы, саһылы уонна андаатараны уруһуйдаабыт. “Уруһуйдуур киһи аахтаҕына эрэ хартыынаны ойуулаан таһаарар”, – диир. Өссө элбэхтик ааҕан кэрэ хартыыналары уруһуйдаан ис!
***
Айаана Андросова Сыырдаахтан кэлбит. Кини 10 сааһыттан уруһуйдуур. Маннык күрэххэ аан бастаан кыттар эбит. Онон долгуйбут. Аттаах собону уруһуйдаабытын көмүскээтэ. Инникитин айымньылаах үлэни баҕарабыт, Айаана!
***
Руслана Макарова Тумултан сылдьар. 5 сааһыттан уруһуйдуур эбит! Иван Мигалкин остуоруйатыттан Алаа Моҕуһу уруһуйдаабыт. Кини суруйааччы остуоруйаларын сөбүлээн ааҕар. Өссө сайдан, иннин хоту баран ис, Руслана!
***
Уйгулаана Копырина Уhун Күөлтэн сылдьар. Алаа Моҕуһу уонна ийэ барахсаны уруһуйдаабыт. Сырдык уонна хараҥа күүстэр диэн ис хоһоонноох. Акварельынан уонна гуаһынан уруhуйдаабыт. Уйгулаана 7 сааһыттан уруһуйдуур. Аан бастаан күрэххэ кыттар. Ситиһиилэри баҕарабыт, Уйгулаана!
Биһиги санаабытыгар, “Сардааналаах кыысчаан” диэн олус үчүгэй күрэх буолан аста. Биһиги оҕолор уруһуйдарын көрөммүт наһаа астынныбыт. Тула өттүбүт кытта сырдаабыт курдук буолла.
Иван Васильевич Мигалкин суруйбут остуоруйаларын, хоһооннорун ааҕан баран уруһуйдаабыттара оҕолорго улахан опыт, сайдыы, үүнүү дии саныыбыт.
Иван Васильевич бииргэ төрөөбүт быраата Афанасий Васильевич Мигалкин эппитин курдук, тыл уонна уруһуй биирдэр.
Катя БАКАЕВА, Алеся НИКОЛАЕВА, VIII “Г” кылаас,
Дьокуускай куорат 17 №-дээх орто оскуолата