Быйыл олунньу ыйга «МУУС УСТАР» ыччат фестивалыгар «СААС» медиа форумҥа таһаарылаахтык үлэлээн, 23 юнкор оҕо Арассыыйабыт киинигэр Москва куоракка айанныыр путевканы туппуппут. Мин онно наһаа да үөрбүтүм. Москваҕа айанныыр күммүтүн ыра санаа оҥостон, өр да өр күүппүтүм.
Дьэ ол кэтэһиилээх күнүм үүнэн, билигин Москва куоракка сылдьабыт. Дойдубут киин куоратыгар сырыыбыт от ыйын 24 күнүттэн 30 күнүгэр диэри буолар.
Олохпор аан бастаан самолётунан көппүтүм. Олус долгуйбутум. Ол гынан баран самолеппар киирбиппэр долгуйбутум ааһан хаалбыта. Москвабытыгар наһаа үчүгэйдик көтөн кэлбиппит. Алта чаас айан диэтэххэ, бириэмэ түргэн баҕайытык ааспыта. Аэропортан тахсыбыппытын кэнниттэн биһигини улахан да улахан оптуобус күүтэн турара.
Москваҕа улахан, кыраһыабай, аныгы көстүүлээх «Измайлово Бета» гостиницаҕа олоробут. «Биһиги маннык үчүгэй гостиницаҕа олоробут дуо?!» диэн бастаан олох итэҕэйбэтэҕим. Үөрбүтүм оччо этэ.
Бастакы күммүтүгэр тута Измайлово уһаайба устун экскурсияҕа барбыппыт. Наһаа интэриэһинэй этэ. Үҥкүүгэ маастар-кылааска сылдьыбыппыт, «Лапта» оонньообуппут.
Мин саха норуотун поэта Иван Мигалкин «Москва саха киһитин хараҕынан» диэн суруйуутун аахпытым. Онно кини маннык диэн суруйбут этэ:
…сыыһа тутуннаххына – үөһэ-аллараа дойдулартан биирдэстэригэр: ырайга тахсарыҥ дуу, аадка түһэрин дуу тус бэйэҕиттэн тутулуктанар.
Кырдьык, Москва наһаа элбэх киһилээх, улахан, күлүмүрдүү турар куорат. Ону мин метроҕа айанныыр кэммэр, уулусса устун хааман иһэн көрдүм. Уонна санаатым.
Маннык улахан куоракка тыа сириттэн кэлбит саха киһитэ хайдах олохсуйан олороро буолуой диэн. Иван Мигалкин эппитин курдук, кырдьык, барыта бэйэҕиттэн тутулуктаах.
Олохпор аан бастаан Москва куораты көрбүппүттэн олус үөрэбин. Күн аайы, күн аайы саҥаны билэбин. Элбэх оҕону кытта билистим. Бу барыта миэхэ улахан ситиһии буолар.
Онтон арай Москва киһи эбитэ буоллар хайдах буолуо этэй диэн өр толкуйдаатым. Мин көрдөхпүнэ, уһун уҥуохтаах, нууччалыы мөссүөннээх эрээри хараҥа соҕус баттахтаах, киэҥ билиилээх, дьылабыай, дьоҥҥо болҕомтолоох сыһыаннаах киһи.
Алёна ТАППЫРОВА, VI кылаас,
В.И. Ленин аатынан Уолба орто оскуолата, Таатта