Иван Васильевич Мигалкин биһиги улууспутуттан, Уус Алдантан, тахсыбыт соҕотох норуот поэта. Кини быйыл 70 сааһыгар биир ый тиийбэккэ олохтон туораабыт. Чугас дьонноро ахталларынан, кини 70 сааһын ааҕааччыларын кытта көрсүөн олус баҕарбыт. Ол баҕа санаатын биир дойдулаахтара толорон, Уус Алдаҥҥа алтынньы 15-17 күннэригэр 70 сааһын киэҥник бэлиэтээтилэр.
Алтынньы 17 күнүгэр Уус Алдан улууһун оскуолаларыгар күөх экран нөҥүө аһаҕас уруок буолла. Биһиги юнкордар видео-уруогу Мүрүтээҕи «Уолан» гимназияҕа олорон көрдүбүт. Тиийээппитин кытта биһигини гимназия дириэктэрин иитэр үлэҕэ сүбэһитэ Айыы Куо Николаевна Троева үөрэ-көтө көрүстэ.
Уруогу Иван Васильевич Мигалкин үөрэммит Мүрү 1 №-дээх оскуолата иилээн-саҕалаан ыытта. Мүрү 2 №-дээх оскуолатын дириэктэрэ, Иван Васильевич быраата Алексей Михайлович Мигалкин салайан ыытта. Уус Алдан улууһун баһылыгын солбуйааччыта Анатолий Дмитриевич Сторожев, улуустааҕы үөрэх управлениетын начальнигын солбуйааччыта Иван Иванович Никонов уруок суолтатын туһунан кэпсээтилэр. Поэт бииргэ төрөөбүт быраата Афанасий Васильевич Мигалкин убайын туһунан билиһиннэрдэ, Иван Мигалкин таптал туһунан хоһоонун ааҕан иһитиннэрдэ.
«Таптал диэн наһаа улахан. Төрөппүттэргэр, төрөөбүт дойдугар, бииргэ төрөөбүттэргэр, чугас дьоҥҥор тапталы харыстааҥ, бэйэҕит кылааскытын таптааҥ уонна көмүскээн!» – диэн оҕолорго үтүө тылын эттэ.
Салгыы Иван Васильевич кэргэнин Зоя Васильевнаны кытта төрүттээбит В.А. Протодьяконов-Кулантай аатынан түмэл үлэһиттэрэ оҥорбут Иван Васильевич Мигалкин туһунан видеону көрдөрдүлэр. Нуучча поэта Константин Симонов «Жди меня» диэн хоһоонун сахалыы тылбаастаабытын туһунан кэпсээтилэр. Иван Васильевич коллекционердарга анаан таһаарбыт «Дьикти дьыала» кинигэтин билиһиннэрдилэр.
Биһиги аһаҕас уруокка сылдьыбыт оҕолортон санааларын ыйыталаһан, интервью ыллыбыт.
Айтал Жирков, Антон Неустроев, Байдам Андросов, Кирилл Захаров, Мүрүтээҕи «Уолан» гимназия V кылааһын үөрэнээччилэрэ:
– Биһиги бу уруокка Иван Васильевич Мигалкин туһунан кэпсээбиттэрин иһиттибит. Кини хоһооннорун музыкалаах аахпыттарын сөбүлээтибит. Иван Васильевич Мигалкин оскуолаҕа үөрэҕэр үчүгэй буолан, соҕуруу «Артек» лааҕырга сынньаммыт. Ити кэмҥэ хоһоон суруйан саҕалаабыт эбит. Дойдутун, дьонун ахтан хоһоон суруйар талаана арыллыбыт.
Янис СЫСОЛЯТИН, VII кылаас, Павел ГЕРАСИМОВ, VIII кылаас,
«Sitim LegMedia» хамаанда юнкордара, Лөгөй лиссиэй-интэринээт, Уус Алдан
Янис Сысолятин хаартыскалара