«Кэскил» медиа оскуола юнкордара Уус Алдаҥҥа 2 Легей нэһилиэгэр Тулунаҕа П.В. Аммосов аатынан оскуолаҕа ыытыллыбыт саха норуотун поэта, оҕо суруйааччыта Иван Мигалкин олоҕор, айар үлэтигэр анаммыт научнай-практическай конференцияҕа сырыттыбыт.
Бэйэбитин кытта саастыы оҕолор саха норуотун поэтын, оҕо суруйааччытын хайдах көрөн чинчийэр эбиттэрин иһиттибит, көрдүбүт. «Иван Мигалкин удьуордара», «Иван Мигалкин – поэт» диэн секцияларга үлэлээтибит. Норуот поэтын олоҕун оҕолор араастан көрөн чинчийбиттэр.
Холобур, Чараҥ орто оскуолатын Х кылааһын үөрэнээччитэ Кюннэй Румянцева Иван Васильевич аҕатын, общественнай-политическай деятель, энтузиаст-учуутал, талааннаах салайааччы Василий Николаевич Мигалкин туһунан чинчийбит. Чараҥ орто оскуолатын VI кылааһын үөрэнээччитэ Нарыйаана Басыгысова Иван Васильевич убайын Николай Васильевич Мигалкины дэгиттэр талааннаах салайааччы, чемпион-суоппар быһыытынан көрөн үөрэппит. Тулуна орто оскуолатын VII кылааһын үөрэнээччитэ Милана Атласова Күбээйи Мэтээлкиттэрэ аҕа уустарыттан Мигалкиннар биллэр личностарын астрологическай портреттарын оҥорбут. Мүрү 1 №-дээх орто оскуолатын IX «Б» кылааһын үөрэнээччитэ Галя Бубякина «Оскуолаттан куорсун анньынан» диэн үлэтин көмүскээтэ. Мүрүтээҕи «Уолан» гимназия IX кылааһын үөрэнээччитэ Юра Никулин Иван Мигалкины эйэ, көҥүл, доҕордоһуу саллаатын быһыытынан арыйан көрдөрдө.
Дьүүллүүр сүбэ быһаарыытынан кыайыылаахтарынан Милана Атласова (VII кылаас, Тулуна орто оскуолата), Нарыйаана Басыгысова (VI кылаас, Чараҥ орто оскуолата), Кюннэй Румянцева (Х кылаас, Чараҥ орто оскуолата), Юра Никулин (IX кылаас, Мүрүтээҕи «Уолан» гимназия) ааттаннылар.
Научнай-практическай конференция кыттыылаахтарын истиҥник эҕэрдэлиибин. Иван Васильевич быраата Афанасий Васильевич Мигалкин эппитин курдук, кыайбыт, хотторбут оҕо диэн суох. Бу барыта өй-санаа үлэтэ буолар.
Валерия ГОТОВЦЕВА, Х кылаас
Айыллаана Готовцева хаартыскалара
«Байаҕантай кэскиллэрэ» юнкорпост,
М.Н. Готовцев аатынан Танда орто оскуолата, Уус Алдан