Муус устар 10 күнүгэр Дьокуускай куорат, С.Н.Донской-II аатынан үөрэх сайдыытын уонна идэ таһымын үрдэтэр үнүстүүт дьиэтигэр төрдүс төгүлүн ыытыллар Өрөспүүбүлүкэтээҕи «Басхан-2024» лиидэр уолаттар дьылабыай оонньууларын кыайыылааҕа билиннэ.
Бүтэһик түһүмэх кэнниттэн (Айыы умсулҕана) оҕолор, көрөөччүлэр, тойон сүбэ буолан «Инники эрэлбит эр киһи» диэн төгүрүк остуол тэрийдилэр. Бу манна инники сайдыы туһунан этиилэр киирдилэр. Уолаттар өйүктэрэ (идиэйэлэрэ) элбэх эбит.
Быйылгы «Басхан-2024» дьыалабыай оонньуу туһунан Геннадий Иванович Охлопковтан туоһуластыбыт.
Охлопков Геннадий Иванович: «Икки күннээх, биэс түһүмэхтээх тэрээһиммит этаптарын барытын көрдүбүт, иһиттибит. Бастатан туран, биһиги бэлиэтиэхпитин баҕарабыт, быйылгы оонньуу таһыма үрдээтэ. Тоҕо диэтэр бастаан 13 улууска муниципальнай таһым ыытыллыбыта. Ол кыайыылахтара бары бу өрөспүүбүлүкэ таһымыгар тахсан кыттыыны ыллылар. Оҕолор бары билиилэрэ-көрүүлэрэ үрдүк. Аны бу биэс түһүмэх кэнниттэн оҕолор, уһуйааччылар төгүрүк остуолга сайдыы туһунан санааларын этиннилэр».
Быйылгы «Басхан-2024» дьыалабыай оонньуу кылаан кыайыылааҕа Андрей Степанов – Чурапчытааҕы С.К.Макаров аатынан гимназия 10-с кылааһын үөрэнээччитэ буолла. Кыайыылаах биһигини кытта санаатын үллэһиннэ.
Степанов Андрей: «Туох баар күрэх, биллэн туран дьарыктан тутулуктаах, дьэ ол курдук эмиэ салаайыччыларым бириэмэ булан дьарыктааннар, бу күрэххэ муҥутуур кыайыылаах буолан таҕыстым. Бу «Басхан» диэн олус үчүгэй күрэх дии саныыбын, тоҕо диэтэр манна оҕолор күрэх кэнниттэн билиилэрэ кэҥиир уонна бэйэни тургутан көрөҕүн. Бу «Басхан» нууччалыы тылбаастаатахха «Лидер» диэн буолар, билигин дойдубутугар дьиҥнээх басхан дьон наадалар.»
Бу бырайыакка кыттыбыт уолаттар бары билиилэрин, көрүүлэрин үллэстэн, дьоҕурдарын көрдөрөн, уу сахалыы тылынан этэн-тыынан бардылар. Уолаттарга салгыы ылсыбыттарын ыһыктыбакка нэһилэк, улуус, өрөспүүбүлүкэ салайааччылара, норуот бас-көс туттар дьоно буола сайдалларыгар баҕарыаҕыҥ.
keskil14.ru