Бүлүү Г.И. Чиряев аатынан 1 №-дээх оскуолатын “Ориентир” пост оператора Коля БУДИЩЕВ видеоҕа устуунан дьарыктанар. Көмпүүтэр эйгэтигэр кини билиитэ-көрүүтэ киэҥ, араас сорудахтары туруорары, хамаандалары биэрэри сатыыр. Оскуолатын бүтэрдэҕинэ, IT хайысхаҕа үөрэниэн баҕарар.
– “Adobe Premier Pro” саамай сөбүлүүр бырагыраамам. Бу көмөтүнэн видеобын таҥабын. Бастаан устубуппун көрөн баран, барытын наардыыбын. Куһаҕанын сотторобун. Үчүгэйин хомуйан, тайм-лайҥҥа уган быһабын. Ол кэнниттэн биирдэ видеоролик бэлэм буолар. Сатаатахха, үөрэннэххэ чэпчэки дьыала. Билигин камерам “Nikon”. 4K киэпкэ олус үчүгэйдик уһулар.
Оҕолорго сүбэлиэм этэ: элбэхтик ааҕыҥ, көмпүүтэр эйгэтин баһылааҥ. Фотошоп, видеомонтаж бырагыраамаларын сатыыр буоллаххытына, туһалаах буолуо.
Коля бу сөбүлүүр дьарыгын таһынан, үөрэҕэр олус кыһаллар. Омук тылын, математика куруһуоктарыгар сылдьан, билиитин кэҥэтэр, дьоҕурун сайыннарар.
«Быйыл Москваҕа «Ланат» сайыҥҥы IT-лааҕырга сынньаныам», — диир. Онон киниэхэ ситиһиилэри баҕарыахха.
IT-ни баһылыа
