Бу күннэргэ республикатааҕы научнай-практическай конференцияҕа кыттан кэлбит биһиги түмсүүбүт оҕолоруттан санаа атастаһан кэпсииллэригэр көрдөстүм.
Айта Орлова, 10-б кылаас: — Мин «Биологическое разнообразие родного края в рассказе Н.А. Лугинова «Баллада о черном вороне» диэн үлэбинэн “Экологические науки” секцияҕа кытынным. Быйыл биир дойдулаахпыт Николай Лугинов 75 сааһын туолар. Бу айымньы айылҕа ситимин олус сиһилии көрдөрөр. Араас оскуолалартан 78 оҕо кыттыбыта. Атын оҕолортон “Экосистема в банке”, “Bред маленьких батареек’’, “Cъедобный пластик” диэн үэлэри сөбүлээтим. Дакылаат суруйан оскуолаҕа-уруокка үөрэппэтэх билиини ылаҕын, элбэх кинигэни ааҕаҕын, ол өйү-санааны сайыннарар.
Кристина Оконешникова, 10-а кылаас: — Мин иккис сылбын “Экос” лааҕырга сылдьан республикатааҕы “Научное лето онлайн” бырайыакка төрөөбүт дойдубут эмтээх үүнээйилэрин үөрэттим. Секциябытыгар 40-н тахса оҕо баара. Гербарийдарбын, хомуйбут эмтээх отторбун көрдөрдүм. Быйыл бу үһүс республикатааҕы конференциям буолар. Эмтээх үүнээйилэр – дойдубут биир баар суох баайа буолар. Ону билэн сатаан туһана үөрэниэхтээхпит. Маны таһынан дакылаатчыт оҕо дьон иннигэр кыбыстыбакка кэпсииргэ үөрэнэр.
Салайааччыбыт Вера Николаевна Заровняева: — 2000 сылтан үөрэнээччилэргэ араас чинчийэр үлэлэри, бырайыактары суруйтарабын. 2003 с. улууспутуттан маҥнайгынан VII «Инникигэ хардыы» республикатааҕы научнай-практическай конференцияҕа ситиһиилээхтик кыттыбыппыт. Оҕо интэриэһин, дьоҕурун көрөн эбэтэр кэмигэр тоҕоостоох темаҕа үлэлиибит. Чинчийэр үлэ — эбии дьарык. Үлэ ис хоһоонун өйдөөн, умсугуйан дьарыктанар оҕо учугэй ситиһиилээх, түмүктээх буолар.
Үөрэнээччилэри уонна салайааччылары сыллааҕы улахан тэрээһиҥҥэ үлэҕитин билиһиннэрбиккитинэн, ситиһиилэргитинэн эҕэрдэлиибин. Чинчийэр үөрэтэр үлэҕэ үгүс үөрүүнү, саҥа арыйыылары, ситиһиилэри баҕарабын.
Петя Эверстов, 10 кылаас, “Нуклеус” түмсүү, Кэбээйи оскуолата.