Дьокуускай куорат 84 нүөмэрдээх уhуйаана «Народнай бюджет» куонкуруһугар «Оҕо уhуйаанын инникитэ — оҕолорго аналлаах спорт саала» бырайыак сүүмэрдиир куонкуруһугар кыттар баҕалаах. Дьокуускай куорат 84 нүөмэрдээх оҕо уhуйаана 1979 сыллаахха тутуллубута. Онтон ыла 45 сыл субуллан ааhа оҕуста. Билиҥҥи туругунан уопсай оҕо ахсаана 410, араас саастаах 12 бөлөх үлэлиир. Оҕону эт-хаан өттүнэн сайыннарар үлэ хайысхалара оҕолор саастарынан уонна доруобуйаларын туругунан сиэттэриллэн оноhуллар.
Биhиги уhуйааммыт 2-тэн 7 саастарыгар диэри эти-хааны чэбдигирдэр «Неболейка» диэн оҕо доруобуйатын чөлүгэр түhэриини күүһүрдэр, анал программаны бигэргэтэн үлэҕэ киллэрдэ.
Бу программа сыала-соруга оҕо доруобуйатын бөҕөргөтүү, мөлтөх доруобуйалаах оҕолорго анал бөлөхтөрү арыйан үлэлэтии, доруобуйатынан хааччахтаах оҕолорго туспа дьарыктары тэрийии, инбэлиит оҕолорго аналлаах чэпчэтиллибит хамсаныылары, эрчиллиилэри оҥотторуу буолар.
410 оҕоттон 13 оҕо доруобуйатынан хааччахтаах, инбэлиит – 6 оҕо, сыллааҕы медицинскэй көрдөрүүлэр түмүктэринэн оҕолор 65% араас хабааннаах ыарыыларынан ыалдьаллара бигэргэнэр. Ол инниттэн оҕо доруобуйатын бөҕөргөтөр хайысхалаах араас эйгэлэр тэриллэн үлэлииллэр. П 2.5.2 СанПин 2.4 36-48-20 пууннарга олоҕуран уhуйааммыт спорт саалатын муостата сөптөөх матырыйаалтан оноhуллуохтаах, сууйарга-соторго табыгастаах буолуохтаах, сууйар раствордар дьайыыларын тулуйуохтаах. Сарсыардаттан киэhээҥҥэ дылы спорт саалатыгар дьарыктар, эбии үөрэхтээhин куруhуоктара ыытыллаллар.
Капитальнай өрөмүөн 2006 сыллаахха оноhуллубута, онтон ыла косметическай эрэ өрөмүөннэринэн муҥурданабыт. Ол иhин бу сайдыылаах аныгы ирдэбилгэ эппиэттиир матырыйааллар дэлэйбит кэмнэригэр биhиги үчүгэй өрөмүөҥҥэ наадыйабыт, киhи хараҕын үөрдэр кэрэ оҥоhуулаах спорт саалаҕа оҕолорбут төһө эрэ үөрэ дьарыктаныа этилэр. Спорт муостатын сабыыта (линолеум) наhаа эргэрдэ, кубарыйда, сорох сирдэринэн абырахтаах. Линолеум эргэрэн оҕо хамсанарыгар моhоллору үөскэтиэн сөп.
ПФХД үбүлээhинэ бу муоста сабыытын ( линолеум) өрөмүөнүн кыайан уйунар кыаҕа суох, ол иhин үлэhиттэр, төрөппүттэр буоламмыт, олохтоох нэhилиэнньэ көҕүлүүр «Народнай бюджет» конкуруһугар «Оҕо уhуйаанын инникитэ — оҕолорго аналлаах спорт саала» бырайыак сүүмэрдиир 2025 сылга ыытыллар куонкуруһугар кыттарга бэлэммит!
Оҕо сайдарыгар улахан суолталаах өрөмүөн оҥоhyлуннаҕына биhиги спорт саалатыгар аныгы, бары ирдэбиллэргэ эппиэттиир муостатын сабыыта үйэлээх, оҕо дьарыктанарыгар табыгастаах буолара саарбаҕа суох. Хас биирдии оҕо, төрөппүт, үлэhит дьарыктанарыгар, үлэлииригэр, сайдарыгар дьиҥнээх усулуобуйа баар буоллаҕына үлэ түмүгэ өрүүтүн ситиhиилээх буолар!
Түмүктээн эттэххэ, бу көҕүлээhини ыйытыктар түмүктэринэн 1200 киhи өйүүр баҕалаах! Оҕо сайдарын туhугар, кэлэр кэнчээри ыччаппыт чөл туруктаах, чэгиэн доруобуйалаах буоларын туhугар бары биир санаанан салайтаран бу бырайыагы өйүөҕүҥ! Инники эрэллэрбит кэскиллэрин түстүөҕүҥ!