2026 сыл Арассыыйа норуоттарын сомоҕолоhууларын, Саха сиригэр култуура, Бүлүү улууhугар нэhилиэстибэ уонна айыллыы сылынан биллэриллибитэ.
Арассыыйаҕа элбэх араас норуот олорор. Норуоттар сомоҕолоһууларын сыалынан кинилэр сыһыаннарын тупсарыы, доҕордоһуу, биир сүбэнэн эйэлээхтик олоруу, ѳйдѳһүү, култуураларын харыстааһын буолар.
Сылы арыйыы чэрчитинэн М.А.Алексеев аатынан Баппаҕаайы оскуолатыгар «Дерево культур» бэстибээл ыытылынна. Тэрээһин Арассыыйа норуоттарын параадынан саҕаламмыта. Кылаастар бары Арассыыйа араас норуоттарын национальнай кѳстүүмнэрин таҥыннылар:
1, 4 кылаас – Татаар омуга;
2, 3 кылаас – Кавказ омуктара;
5 кылаас – Алтайдар;
6, 7 кылаас – сахалар;
8 кылаас – эбэҥкилэр;
9 кылаас – долганнар;
10, 11 кылаас – нуучча норуоттара.
Бу норуоттар символларынан анал зона оҥордулар: былаахтара, гербэлэрэ, сирин хаартата, таҥастара, талбыт норуоттарын туhунан иhитиннэрии. Норуоттар култуураларын, иис-уус уонна үгэстэрин кытта билиһиннэрэр сыаллаах «Арассыыйа араас өҥнөрө» диэн быыстапка тэрийэн, малларын, сувенирдарын булан, бүлүүдэлэрин буhаран уурдулар. Тэрээhини учууталлар, оҕолор Арассыыйа норуоттарын үҥкүүлэринэн кэнсиэр туруоран киэргэттилэр. Түмсүүбүтүн, баай култуурабытын, өбүгэлэрбит үйэлээх сыаннастарын алҕыыр ырыалары, үҥкүүлэри уонна хоһооннору толордулар.
Биир сүрүн үлэнэн култуура маhын киэргэтии буолла. Анал маска талбыт норуоттарын харысхал бэлиэлэрин оҥорон ыйаатылар.
Бу сыл доҕордоһууну бөҕөргөтөр, ураты култуураны харыстыыр, төрөөбүт сири сайыннарар уонна өбүгэлэрбит өйдөбүллэрин саҥа көлүөнэҕэ биэрэр уопсай суолбут. Бу айар кэмҥэ чаҕылхай саҕалааhыны бары бииргэ тэрийиэҕиҥ!
Андреева Айаана, 9 кылаас, “Кѳмүс бѳрүѳ” медиа киин, Илбэҥэ, Бүлүү улууhа.