Ил Дархан Харыйата: «Ийэ дойду күүһэ. Саха сирин оҕолоро»

Ахсынньы 21 күнүгэр Марфа уонна Сергей Расторгуевтар ааттарынан Саха государственнай циркатыгар Ил Дархан Харыйата буолан ааста. Быйыл бу тэрээһин 20-с төгүлүн ыытылынна. Үгэс быһыытынан, манна үөрэх туйгуннара, наука, култуура, спорт эйгэлэригэр  ситиһиилээх үөрэнээччилэр өрөспүүбүлүкэ бары  оскуолаларыттан түмсэллэр.

Ил Дархан Харыйатын быйылгы тэрээһинэ «Ийэ дойду күүһэ. Саха сирин оҕолоро» диэн девизтээх ыытылынна.

Бу хас биирдии киһиэхэ сыһыаннаах девиз. Ону өссө чопчулаан, Ил Дархан Харыйатыгар кэлбит оҕолорго анаан саха циркатын аренатыгар оҕо суруйааччыта Самуил Маршак 1942 сыллаахха суруйбут «12 ый» остуоруйатынан туруорууну көрдөрдүлэр.

Остуоруйа үтүө, истиҥ санаалаах, аһыныгас, атын киһи үлэтин сыаналыыр, дьоҥҥо куһаҕаны баҕарбат, ымсыырбат, албыннаабат уонна бырастыы гынары сатыыр буоларга үөрэтэр ис хоһоонноох.

Цирка артыыстара ону барытын түмэн көрдөрдүлэр. Киһи барыта, сааһыттан тутулуга суох, туох эрэ дьиктигэ итэҕэйэр, ханнык да түгэҥҥэ бу олохтон кэрэни, сырдыгы син биир эрэнэ күүтэр.

«12 ый» остуоруйаҕа Арассыыйа саамай биллэр цирковай дьиэ кэргэнэ Виталий, Дарья, Злата Заец, Маргарита Заец-Никулина «Восхождение»  диэн акробатическай нүөмэрдэрэ көрөөччүлэри улаханнык сөхтөрдө. Дьиэ кэргэн түмсүүтүн, кыаҕын, кэрэни, дьиктини бэлэхтиир күүһүн цирка аренатыгар бары да сөҕө-махтайа көрдүбүт.

Өрөспүүбүлүкэбит Ил Дархана Айсен Сергеевич Николаев 2025 сыл Ийэ дойдуну көмүскээччилэр сылларынан биллэриллибитин бэлиэтээн туран оҕолорго туһаайан:

«Мин киэҥ туттабын, Саха сирин  эдэр көлүөнэтэ дойдубут дьиҥнээх патриоттара буолан үүнэн иһэллэринэн. Билигин дойду эйэ, көҥүл иһин охсуһар кэмигэр эһиги инникигэ дьулуһуугут, Ийэ дойдуну көмүскүүр баҕаҕыт уһулуччу суолталаах. Бу патриотическай тыыны харыстыахха уонна сайыннарыахха наада. Ийэ дойдубутун мэлдьи көмүскүүбүт – үчүгэйдик үөрэнэн, үрдүк көрдөрүүлэри ситиһэн, өрөспүүбүлүкэбитин, дойдубутун сайыннарабыт. Маннык курдук бэриниилээх уонна талааннаах буолуҥ. Билигин балысханнык сайдар өрөспүүбүлүкэ эһигини куруук өйүөҕэ, тоҕо диэтэххэ, биһиги инникибит эһиги буолаҕыт», – диэн эттэ.

Ил Дархан  Айсен Сергеевич Николаев үгэс быһыытынан, 10 уһулуччу ситиһиилээх үөрэнээччилэргэ анал стипендиятын туттарда.

20-с төгүлүн ыытыллыбыт Ил Дархан Харыйата өрөспүүбүлүкэ 700-кэ үөрэнээччитигэр үйэлээх үтүө өйдөбүллэри, Ийэ дойду дириҥ суолтатын иҥэрбитигэр саарбахтаабаппыт.

Роберт ТАРАСОВ, keskil14.ru

Андрей Сорокин СИА хаартыскалара