Улуу Кыайыы 80 сылыгар анаммыт 2025 сыл түмүктэнэрэ аҕыйах хонук хаалла, онон сыл түмүктэрин биһиги Сахабыт сирин Ил Дархана Айсен Сергеевич Николаев анал этиитин ахсынньы 23 күнүгэр бүттүүн Саха Өрөспүүбүлүкэтин олохтоохторо күөх экран нөҥүө бары көрдүбүт, иһиттибит.
Ол курдук, лиссиэйбит дириэктэрэ Михаил Петрович Пухов маннык диэн санаатын үллэһиннэ:
Ахсынньы 23 күнүгэр Саха Өрөспүүбүлүкэтин Ил Дархана Айсен Сергеевич Николаев Ил Түмэн Судаарыстыбаннай Мунньаҕар Анал этиитин оҥордо. Дойдуга уонна өрөспүүбүлүкэбитигэр кэлэр сылга сүрүн соруктары иһитиннэрдэ. Дойдубут сүрдээх тэтимнээхтик сайдан иһэр, ону кытта тэҥҥэ өрөспүүбүлүкэбит эмиэ олох бары хайысхата 5 сыл иһигэр сайдыбытын үөрэ иһиттибит. Чуолаан үөрэхтээһин эйгэтигэр 5 сыл иһигэр 62 саҥа оскуола, 36 оҕо уһуйааннара тутуллан киирбиттэрэ дойдубут кэлэр көлүөнэ ыччатыгар болҕомто уурулларын туоһулуур.
Айсен Сергеевич, биллэн турар, билиҥҥи тыҥааһыннаах кэмҥэ хас биирдии кэнчээри ыччаппыт дойдутугар бэриниилээх, олоҕу кытта тэҥҥэ хардыылыыр, чөл олохтоох буоллаҕына, биһиги олохпут инники сайдыылаах уонна тирэхтээх буоларын бэлиэтээтэ.
Саха тыла үөрэхтээх киһи быһыытынан, оскуола программатыгар саха тылын чаастара булгуччу хаалларар туһунан этиитин сэргээтим. Төрөөбүт тыл сайдарын туһугар элбэх үлэ барар, гынан баран син биир кэккэ кыһалҕалар бааллар. Төрөөбүт тыл дьиэ кэргэнтэн, ийэттэн-аҕаттан саҕаланар. Уонна, биллэн турар, оҕо уһуйаана, оскуола, учууталлар, салалта төрөөбүт тыл сүппэтин, симэлийбэтин туһугар тиһиктээх үлэ ыытарбыт булгуччулаах дии саныыбын.
Ил Дархан Саха сиригэр туризм күүскэ сайдыахтааҕын туһунан эттэ. Туризм омук быһыытынан уратыбытын, итэҕэлбитин, култуурабытын киэҥ эйгэҕэ таһааран билиһиннэрии биир улахан хайысхата буолар. Үүнэр 2026 сылы Ил Дархан Култуура сылынан биллэрдэ. Саха норуотун култууратын уонна историятын нэһилиэстибэтин үйэтитэр сыаллаах-соруктаах үлэлэр ыытыллаллара былааннанарын иһитиннэрдэ. Култуура эйгэтигэр, дьон-сэргэ култуурунай өйүгэр-санаатыгар көхтөөх сыл буолуо диэн күүтэбин. Чуолаан Уус Алдаммыт улууһугар култуура, духуобунас эйгэтигэр улахан болҕомто ууруллан элбэх үлэ ыытыллыа диэн эрэнэбит.
Янис СЫСОЛЯТИН, VIII кылаас, Лөгөй лиссиэй-интэринээт
«SiTiM LegMedia» юнкора, Уус Алдан