Н.Е. Мординов-Амма Аччыгыйа аатынан «Кэскил» оҕо бэчээтин кыһата 2023 сылга 21 улууска 158 медиа-оскуоланы үлэлэтэн кэллэ. Манна 470-тан тахса учуутал үлэлиир, 800-кэ оҕо дьарыктанар.
Өрөспүүбүлүкэ үөрэнээччилэрин саамай улахан тэрээһинигэр 2023 сыл ахсынньы 24 күнүгэр буолбут Ил Дархан Харыйатыгар 27 эдэр кэрэспэдьиэн кыттыыны ылла. 2023 сыл устата айымньылаахтык үлэлээбит оҕолор Ил Дарханы Айсен Сергеевич Николаевы кытта көрсөн кэпсэттибит.
Мин «Кэскил» медиа-оскуола эдэр кэрэспэдьиэнэ буолан тураммын Айсен Сергеевич Николаевы кытта көрсөн, интервью ылар үрдүк чиэскэ тигистим.
Пресс-конференцияҕа «Кэскил» медиа-оскуола биэс бастыҥ кэрэспэдьиэнэ кыттыыны ыллыбыт: Анжелина Жданова (Н.И. Кочнев аатынан 1-Хаҥалас орто оскуолата, Ньурба), Гаврил Дьяконов (М.Е. Охлопкова аатынан Түбэ орто оскуолата, Нам), Дайаана Прокопьева (Арктика оскуолата, Дьокуускай), Николай Олесов (Лөгөй орто оскуолата, Уус Алдан) уонна мин. Краснослав Васильев (Н.И. Кочнев аатынан 1-Хаҥалас орто оскуолата, Ньурба) «Кэскил» оҕо бэчээтин кыһатын оператордарын Иннокентий Черкашины, Аэлита Миры кытта тэҥҥэ үлэлэстэ.
Айсен Сергеевыһы кытта кэпсэтиини «Кэскил» оҕо бэчээтин кыһатын дириэктэрэ Ольга Ивановна Семенова иилээн-саҕалаан ыытта. Хас биирдиибитин Ил Дархан иннигэр билиһиннэрдэ уонна медиа-оскуола ситиһиилээхтик үлэлииригэр биһиги туох туһаны аҕалбыппытын Айсен Сергеевичка кэпсээбитэ. Биллэн туран, ити биһиэхэ сүрдээх улахан эппиэтинэһи сүктэрэр. Өрөспүүбүлүкэ олоҕор суолталаах үлэни ыытар эбиппит диэн киэн тутта иһиттибит.
«Учууталларбар табыллыбыт дьоллоох киһибин»
Ил Дархаҥҥа ыйытыыларбытын сахалыы, нууччалыы тылынан биэрдибит. Мин Айсен Сергеевичтан наставник (уһуйааччы) диэн кими ааттыырын туһунан ыйыттым. Онуоха кини маннык хоруйдаата:
Хас биирдии киһи олоҕор наставник личноһа олус улахан суолталаах. Педагогтар туһунан этэр буоллахпытына, бастакы учуутал, салгыы орто, үрдүкү кылааска үөрэппит учууталлар оруоллара олус улаханнар. «Дойдубут инники кэскилэ учуутал, педагог илиитигэр баар» диэн этиини кытта толору сөпсөһөбүн.
Мин олохпор учууталлар сүрдээх улахан оруолу оонньообуттара. Валентина Николаевна Платонова диэн бастакы учууталлаах этим. Салгыы орто, үрдүкү кылаастарга эмиэ олус үчүгэй учууталларга үөрэммитим. Мин үөрэммит Үөһээ Бүлүүтээҕи физико-математическай оскуолам биллэр оскуола. Манна биир кэмҥэ ССРС норуодунай учуутала Михаил Андреевич Алексеев, кэлин Россия наруодунай учууталын аатын ылбыт Виктор Филиппович Потапов үлэлээбиттэрэ. Онон учууталларбар табыллыбыт дьоллоох киһибин.
«Рабочай идэлэргэ үлэһит тиийбэт«
Анжелина Жданова оҕону, төрөппүтү, учууталы – барыларын долгутар, таарыйар ыйытыыны биэрдэ. Кини Айсен Сергеевичтан оскуоланы бүтэрэр оҕолор өрөспүүбүлүкэбит сайдыытыгар сүрүн боҕомтобутун туохха туһаайыахтаахпытын туһунан санаатын үллэстэригэр көрдөстө.
Айсен Сергеевич барыбытын толкуйдатар хоруйу биэрдэ:
Мин куруук этэбин – оҕо бэйэтин баҕатынан үөрэххэ киириэн наада. Мин оҕоҕо «бу үөрэххэ киир» диэн этэртэн куруук туттунабын. Тоҕо диэтэххэ, киһи дьоҕура араас – ким эрэ музыкаҕа, ким эрэ спорка, наукаҕа чугас, ким эрэ салайар үлэҕэ. Оҕо оскуоланы бүтэрэригэр ким буоларын бэйэтэ быһаарынар кыахтаах киһи буолан тахсыахтаах. Онтон оҕолорбутун оскуолаҕа үөрэнэ сырыттахтарына, ким буолалларын бэлэмнээн таһаарарбыт, ол атын боппуруос.
Ити өттүгэр биһигини элбэх үлэ күүтэр. Хомойуох иһин, оскуоланы бүтэрэр оҕолор тирээн кэллэҕинэ биирдэ ханна киирэллэрин быһаарынар түгэннэрэ элбэх. Мин санаабар, ити сыыһа. Оҕолору кыра эрдэхтэриттэн үлэҕэ чугаһатаммыт, дьоҕурун, сатабылын сайыннараммыт оскуоланы бүтэрэригэр кини кырдьыктыы мин бу үөрэххэ киирэбин диэн быһаарыныахтаах. Билигин хайысха элбэх. Россияҕа даҕаны, өрөспүүбүлүкэҕэ даҕаны оҕолор тохсус кылаас кэнниттэн орто анал үөрэхтэргэ киирэллэр. Тоҕо диэтэххэ, рабочай идэлэргэ үлэһит тиийбэт. Биһиги өрөспүүбүлүкэбитигэр 11 тыһыынча үлэ миэстэтэ аһаҕас турар. Ону сатаан саппакка олоробут. Чох, алмаас хостооһунуттан саҕалаан гаас улахан тэрилтэлэригэр тиийэ тыһыынчанан вакансиялара бааллар.
Ил Дархан А.С.Николаевы кытта пресс-конференциябытын сиһилии манна көрүҥ: https://vk.com/video-199463452_456240960
Вика БОРИСОВА, XI кылаас, А.П. Илларионов аатынан
Хайахсыт орто оскуолата, Чурапчы