Күндү Сахабыт сирин олохтоохторо!
Саха Өрөспүүбүлүкэтин салалтатын уонна тус бэйэм ааппыттан Россия Федерациятын Судаарыстыбаннай былааҕын күнүнэн истиҥник эҕэрдэлиибин!
Отут сыллааҕыта, 1991 сыл атырдьах ыйын 22 күнүгэр, үс өҥнөөх былаах саҥа Россия символынан билиниллибитэ уонна сүҥкэн уларыйыылар кэмнэрин чаҕылхай бэлиэтэ буолан Ийэ дойдубут киин куоратын халлааныгар тэлээрбитэ. Былаах олохпут бары дьоһун түгэннэригэр биһигини арыаллыыр, дойдубут албан ааттаах историятын кэрэһилиир.
Бу сырдык бырааһынньык улуу Россия модун кыаҕын, аҕа көлүөнэ хорсун быһыытын, күүрээннээх үлэтин саҥа көлүөнэ утумнаан иһэрин туоһулуур. Дойдубут былааҕар ытыктабыллаах сыһыаммыт — бу Аҕа дойдубут баай историятыгар, үтүө үгэстэригэр сүгүрүйүү. Россия былааҕа — элбэх омуктаах норуот сомоҕолоһуутун, дойдутугар тапталын, булгуруйбат санаатын бэлиэтэ.
Сибиири уонна Уһук Илини баһылааһын саҕаланыаҕыттан Саха сирэ дойду хотугулуу-илиҥҥи өттүгэр бигэ тирэх буолбута, геостратегическай кыаҕынан, баай култууратынан дойду сайдыытыгар дьоһун кылаатын киллэрэр.
Россия үс өҥнөөх былааҕа хайа да кэмҥэ Ийэ дойду тутулуга суох буолуутун туруулаһар дьону түмэр аналлаах. Бүгүн пандемия уустук кэмигэр Саха сирин олохтоохторо төрөөбүт сирдэрин-уоттарын хаһан да буолбатах ойуур баһаардарыттан хорсуннук көмүскүүллэр. Онуоха дойдубут араас муннуктарыттан уоту кытта охсуһааччылар биһиэхэ көмөлөһөллөр, Россия олохтоохторо өйөбүлү оҥороллор. Биһиги бииргэ бу мэһэйдэри туоратыахпыт — биһиги күүспүт итиннэ!
Судаарыстыба былааҕа модун кыахтаах, чэчирии сайдар дойду үрдүнэн тэлимниирин туһугар хас биирдиибит олоҕор туруоруммут сыалын уонна соругун ситиһэн салгыы таһаарыылаахтык үлэлииригэр бигэтик эрэнэбин. Улуу Россия инники кэскилин түстүүр саҕалааһыннарбыт тэтимнээхтик олоххо киирдиннэр, уопсай дьиэбитигэр истиҥ тапталбыт биһиги сүрэхпитигэр өрүүтүн киэн туттууну саҕа турдун!
Күндү Саха сирин олохтоохторо! Бу бэлиэ күн барыгытыгар кытаанах доруобуйаны, дьолу-соргуну, этэҥҥэ буолууну, ситиһиини, уйгуну баҕарабын!
Саха Өрөспүүбүлүкэтин Ил Дархана Айсен Николаев.