Бүгүн, ахсынньы 20 күнүгэр, Марфа, Сергей Расторгуевтар ааттарынан Саха Судаарыстыбаннай Циркатын уораҕайыгар өрөспүүбүлүкэ бастыҥ үөрэнээччилэрин Ил Дархан Харыйатыгар чиэстээтилэр. Бу күҥҥэ кыттааччыларга анаан араас маастар кылаастар ыытылыннылар уонна күүтүлээх Ил Дархан харыйатын сүрүн чааһа буолла.
Биһиэхэ, оҕолорго, бу күн олохпутугар олус улахан суолталаах түгэн буолар. Саҥа билсиһиилэр, санаа атастаһыыта — дьикти, кэрэ түгэннэр. Мин наукаҕа үрдүк ситиһиилэрим иһин Ил Дархан харыйатыгар Саха сирин Билим Дьоҕус Академиятын ыҥырыытынан кэлбитим.
Бүгүҥҥү күнтэн биир умнуллубат түгэним «Кэскил» юнкордара буоламмыт Саха Өрөспүүбүлүкэтин Ил Дарханын — Айсен Сергеевич Николаевы кытта кэпсэтиибит буолар. Айсен Сергеевич хас биирдии юнкор бэлэмнээбит ыйытыктарыгар бэйэтин санаатын үллэһиннэ. Тус бэйэм «Эһиги дьиэ кэргэҥҥит саҥа дьылы көрсөр туох үгэстээҕий уонна элбэх дьиэ кэргэн харыйа оонньуурдарын мунньар идэлээх, эһиги ханнык харыйа оонньуурун долгуйа таһааран харыйаҕытын симиигитий?» диэн ыйыттым.
Онуоха, Айсен Сергеевич сыл ахсын Саха сиригэр кыһын саҕаланар күнүгэр харыйатын дьиэ кэргэнинээн туруорарын, кэргэнин кытта эдэр саастарыттан харыйа оонньуурдарын мунньалларын, билигин ону көрөн үөрэ саныылларын үллэһиннэ. Билигин бу үтүө үгэһи кыыыһа эмиэ салҕыылларын астына бэлиэтээтэ.
Айсен Сергеевич Николаев:
Мин кыра эрдэхпиттэн харыйаны симиирбин олус сөбүлүүбүн. Билигин даҕаны бириэмэ аттаран бэйэм салайаммын харыйабытын дьиэ кэргэмминээн киэргэтэбит. Ахсынньы саҕаланыыта харыйабыт биһиэхэ хайаан да турар. Биһиги кэргэмминээн эдэр сааспытыттан харыйабытыгар ыйыыр оонньуурады хомуйабыт. Харыйабытын симии туран бу оонньууру хас эрэ сыллаахха ылбыппыт диэн, ол кэми санаан ылабыт. Мин санаабар бу наһаа үчүгэй үгэс. Ханнык баҕарар ыалга баара буолуо дии саныыбын.
Сайаана ТЕРЕХОВА, XI кылаас, «Дьоҕур» медиа-киин, Кэбээйи орто оскуолата