Ахсынньы 21 күнэ. Дьэ бу күн оскуолатааҕы сылларын устата бэйэлэрин көрдөрбүт, үөрэх-билии өттүгэр күүскэ кыһаллыбыт бастыҥтан бастыҥ оҕолору түмэр Саха өрөспүүбүлүкэтин Ил Дарханын Харыйата үрдүк таһымнаахтык буолан ааста.
Уопсайа бу тэрээһиҥҥэ Сахабыт сирин 35 улууһун бары оскуолаларыттан 700-тэн тахса оҕо кэлбит. Онтон Чурапчы улууһуттан уопсайа 26 оҕо буолан кыттыыны ыллыбыт.
Олус интэриэһинэй, киһини үөрдэр, долгутуулаах тэрээһиҥҥэ сырыттым дии санаатым. Хаһан эрэ кыра эрдэхпинэ эбэм «биһиги оскуолабытыттан биир оҕо Ил Дархан Харыйатыгар сылдьыбыт» диэн кэпсээбитигэр олуһун соһуйбутум. Уонна «хаһан эмит мин эмиэ оннук барарым дуу» диэн ыра санаа миэхэ олохсуйбута.
Онтон быйыл ыра санаам туолан, доҕотторбун кытта Ил Дархан Харыйатыгар сылдьыбыппыттан олуһун үөрдүм, дьоллоннум, дуоһуйдум.
Аны тэрээһин кыттыылааҕа буоларым таһынан, Н.Е. Мординов-Амма Аччыгыйа аатынан «Кэскил» оҕо бэчээтин кыһатын аатыттан алта юнкор – Артем Ларионов (Тулагы), Алина Григорьева (2-с Малдьаҕар, Хаҥалас), Алена Максимова (Бордоҥ, Сунтаар), Альберт Арбыкин (Бүлүү), Сайыына Дьячковская (Майа лиссиэйэ, Мэҥэ Хаҥалас) уонна мин – өрөспүүбүлүкэ Ил Дарханын Айсен Сергеевич Николаевтан интервью ыллыбыт. Маннык эппиэтинэстээх соругу анаабыттарыттан олуһун долгуйбутум уонна соһуйбутум. «Кэскил» оҕо бэчээтин кыһата маннык улахан эппиэтинэһи сүктэрбитэ юнкор быһыытынан улахан ситиһиим буолар диэн сыаналыыбын.
Өрөспүүбүлүкэ Ил Дарханын кытта доҕордуу сыһыан, анал байыаннай дьайыыларга оҕолор тугунан көмө буоларбытын туһунан олус истиҥник кэпсэттибит. «Кэскил» юнкордарын аатыттан кэпсэтиибит түмүгэр Ил Дархаммытыгар бэлэхпитин туттардыбыт. Бу урыта бэлэх буолла дии саныыбын. “Орлята России” федеральнай бырайыак “Өксөкү сиэннэрэ” диэн сахалыы программата оҥоһуллан быйылгы үөрэх дьылыттан олоххо киирбитэ. “Орлята России” — “Өксөкү сиэннэрэ” сэттэ трегын символларын Саҥа дьыллааҕы харыйа оонньуурдара гынан оҥорбуппутун бэлэхтээтибит. Олус долгутуулаах түгэн буолан ааста.
Түмүккэ, маннык тэрээһиннэр биһиги өрөспүүбүлүкэбитигэр баара олус үчүгэй диэн санаалаах бу суруйуубун түмүктүүбүн. Оҕолор бэйэлэригэр сыал-сорук оҥостон үүнэллэригэр-сайдалларыгар туһалаах. Онон тэрийээччилэргэ уонна өрөспүүбүлүкэбит салалтатыгар оҕолорго аныыр болҕомтоҕут иһин барҕа махталбын тиэрдэбин.
Вадим КОЛЕСОВ, XI кылаас,
А.П. Илларионов аатынан Хайахсыт орто оскуолата, Чурапчы
Андрей Сорокин, СИА уонна ааптар хаартыскалара
keskil14.ru