Ахсынньы 20 күнүгэр Марфа, Сергей Расторгуевтар ааттарынан Саха Судаарыстыбаннай Циркатын уораҕайыгар олус күүтүүлээх, олус долгутуулаах түгэн Ил Дархан Харыйата буолла.
Өрөспүүбүлүкэ араас муннуктарыттан оҕолор кытта, көрө кэллибит, олус сэргээтибит уонна дуоһуйдубут. Ил Дархан Харыйата диэн оҕолорго анаммыт дьикти кэм, үөрүү-көтүү уонна кэрэни күүтүү бэлиэтэ. Бу тэрээһиҥҥэ Ил Дархан оҕолору кытта көрсүһэр, кинилэри эҕэрдэлиир, олохторугар ситиһиилэри баҕарар. Оҕолор Ил Дархантан бэйэтинэн эҕэрдэни истэн, кэскиллээх дьон буола улааттахтарына, олохторо дьолунан, ситиһиинэн толору буолуо диэн ыраланаллар.
Ону кытары биһиги «Кэскил» оҕо бэчээтин кыһатын 6 бастыҥ эдэр кэрэспэдьиэннэр буолан Ил Дархантан Айсен Сергеевич Николаевтан ыйытыы биэрэр чиэскэ тигистибит.
Ол курдук, мин бэйэм «Дойдубут президиэнэ Владимир Владимирович Путин бэҕэһээҥҥи быһа холонуутугар кинигэ сыаннаһын туһунан эппитэ, ол курдук, нуучча классиктарыттан сөбүлүүр суруйааччыҥ уонна сөбүлүүр кинигэҥ туһунан кэпсиэҥ дуо?» диэн ыйытыыны биэрдим.
Мин саамай таптыыр суруйааччым — Михаил Афанасьевич Булгаков буолар уонна оскуолаҕа үөрэнэ сылдьаммын «Мастер и Маргарита» аахпытым — саамай биир таптыыр кинигэм, ол иһин бу нуучча классиктара диэн улуу дьоннор. Улуу суруйааччылары барыларын аахпытым: Пушкины, Лермонтову, Достоевскайы, Булгакову. Сүрдээҕин киэн туттабын бу биһиги курдук дойдуга итинник улуу суруйаачылар баар буоланнар, соҕотох Россия эрэ буолбакка, Россия омуга эрэ буолбакка — Аан дойду барыта кинилэринэн киэн туттар. Дьон-сэргэ, биһиги киһи буоларбыт быһыытын туһунан суруйан таһаараннар, дьон эйгэтин иһигэр өйү-санааны тупсаран, сайыннаран улаатыннарбыт дьон буолаллар. Ол иһин, кинигэни ааҕыахха наада. Саха суруйааччылара буоллуннар, нуучча суруйааччылара буоллуннар, атын омук суруйааччылара буоллуннар, биһиги кинигэни ааҕаммыт байабыт, бэйэбитин сайыннарабыт. Биһиги сайыннахпытына оҕолорбутун сайыннарабыт, дьоммутун-сэргэбитин сайыннарабыт, ол иһин, ааҕар киһи — күүстээх киһи! — диэн Айсен Сергеевич хоруйдаата.
Ил Дарханныын көрсүһүү оҕолорго умнуллубат өйдөбүллэри хаалларар. Кинилэр кэнэҕэски олохторугар хайаан да үтүө дьыалалары оҥорорго дьулуһаллар, төрөөбүт дойдуларыгар туһалаах дьон буола улааталлар. Саха сирин Ил Дарханын Ёлката – кэрэ, үөрүүлээх түгэн буолан, оҕолор сүрэхтэригэр ыраас, сырдык өйдөбүлү хаалларар.
Мария ТИЩЕНКО, ХI кылаас, Лөгөй-лиссиэй интэринээт, Уус Алдан