Бүгүн, ахсынньы 21 күнүгэр, күүтүүлээх түгэн буолан ааста — Ил Дархан Харыйата. Бу эрэ күн, сыл ахсын буоларын курдук, Марфа уонна Сергей Расторгуевтар ааттарынан Саха Өрөспүүбүлүкэтин Судаарыстыбыннай циркэтигэр киэҥ нэлэмэн өрөспүүбүлүкэбит араас улуустарыттан 700-чэкэ оскуола чаҕылхай, ситиһиилээх оҕолоро, бастыҥнартан бастыҥнара тоҕуоруһа муһуннулар. Өрөспүүбүлүкэтээҕи, Арассыыйатааҕы, Аан дойдутааҕы араас күрэхтэр кыайыылаахтара, үөрэх бастыҥнара, талааннаах, спортка чаҕылхай көрдөрүүлээх оҕолору бу күн үөрүүлээх быһыыга-майгыга чиэстээтилэр.
Харыйа бастыҥ оҕолоро бары араас уопсайдарынан, сынньанар кииннэринэн түһэн, маҥнайгы күҥҥэ маастар-кылаастарга сылдьан, бүгүҥҥү үөрүүлээх түгэҥҥэ бэлэмнэнэн, үгүс оҕолору кытары билсиһэн, икки күннээх умнуллубат бириэмэни атаардылар.
Бүгүҥҥү Харыйа хаамыыта Самуил Маршак «12 ый» остуоруйатын көрдөрүүтүттэн уонна улахан цирковой туруорууттан саҕаланна. Судаарыстыбыннай цирк иһинэн үлэлиир «Арктик цирк» оҕо устуудьуйата, «Голос» вокальнай устуудьуйата уонна Москва куораттан ыалдьыттар, цирковой дьиэ кэргэн, Виталий Заец, Маргарита Никулина, оҕолоро Дарья уонна Злата кыттыыны ыллылар. Туруоруу биир күүтүүлээх түгэнинэн Харыйа тыгыыта, Чысхаан уонна Хаарчаана кэлиилэрэ буолла. Биир чаастаах улахан цирковой туруоруу оҕолору сөхтөрдө уонна саҥа дьыл сүргэтин бэлэхтээтэ.
Тэрээһин сүрүн түгэнинэн Ил Дархан Айсен Сергеевич Николаев оҕолору кытта көрсүһүүтэ, бастыҥнары бэлиэтээһинэ уонна инники кэнчээри ыччакка үтүө тыллара, анал этиилэрэ буолла:
Күндү оҕолор, Сахабыт сирин кэскилэ, сарсыҥҥыта, убаастабыллаах доҕоттор, бука барыгытын кэлэн иһэр саҥа сылынан, ороһооспонон итиитик-истиҥник эҕэрдэлиирбин көҥүллээҥ! Бүгүҥҥү тэрээһиҥҥэ кыттыыны ыла сылдьарбыттан олус үөрэбин. Сылтан сыл ахсын буолар тэрээһиммит, Ил Дархан Харыйата, бу сылга 20-с төгүлүн ыытылла турар. Мин эһиги дьоллоох уонна эйэҕэс бэйэлэргитин көрөн үөрэбин — биһиги Өрөспүүбүлүкэбитин сайыннарар, ол туһугар үлэлиир дьону көрөммүн. Мин эһигинэн олус киэн туттабын, араас хайысхаларга барытыгар көрдөрөр ситиһиилэргитигэр үөрэбин: оскуола олимпиадаларыгар, култуура эйгэтигэр, спортка уо.д.а. Ааһан эрэр сыл биир бэлиэ тэрээһининэн үрдүк таһымнаахтык ааспыт VIII «Азия оҕолоро» оонньууларбыт буолаллар. Билиҥҥи үүнэн эрэр көлүөнэ дойдуга бэриниилээх буола улаатарын көрөн киэн тутта саныыбын. Дойдубут эйэлээх халлаан иһин охсуһа сылдьарыгар эһиги дьулуургут олус суолталаах. Ону куруук харыстыы уонна тарҕата сылдьыахтаахпыт. Кэлэр 2025 сылы Дойдубут Президенэ Владимир Владимирович Путин Аҕа дойду көмүскээччилэрин күннэринэн биллэрдэ. Бу сыл суолтата байыаннай дьыаланы эрэ кытта сибээстээх буолбатах. Эһиги үөрэххитигэр ситиһиилэргитинэн, үрдүк дабайыыларгытынан дойдугутун күүһүрдэҕит, сайыннараҕыт. Дойдугут эһигини куруук харыстыыр уонна көмүскүүр. Тоҕо диэтэр, бигиһи инникибит — эһиги!
Айсен Сергеевич, буоларын курдук, 10 бастыҥ оҕолору чиэстээтэ. Бастыҥнартан бастыҥнар ааттаннылар:
- Андрей Аргунов (Дьокуускайдааҕы Кадетскай оскуола, 11кыл.);
- Ганна Степанова (Хатыстыыр 20№-дээх орто оскуолата, Алдан, 11 кыл.);
- Николай Яковлев (Дьокуускай куорат 29№-дээх орто оскуолата, 9 кыл.);
- Саргылаана Неморицына (Ытык Күөл 1№-дээх орто оскуолата, Таатта, 11 кыл.);
- Артем Шарков (Покровскай куорат 3№-дээх орто оскуолата, Хаҥалас, 11 кыл.);
- Виктория Царук (Нерюнгри куорат 18№-дээх орто оскуолата, 11 кыл.);
- Эдуард Габышев (Өлүөхүмэ куорат 1№-дээх орто оскуолата, 11 кыл.);
- Полина Михайленко (Уус Мил орто оскуолата, Уус Майа, 9 кыл.);
- Константин Соловьев (Эдьигээн орто оскуолата, 11 кыл.);
- Миранда Морозова (Бүлүүчээн лицей-интернат, Сунтаар, 11кыл.).
Өрөспүүбүлкэ бары оҕолорун аатыттан Алдан улууһун Хатыстыыр 20№-дээх орто оскуолатын 11 кылааһын үөрэнээччитэ Ганна Степанова тыл эттэ уонна Ил Дархаҥҥа бэлэхтэрин уунна:
Бүгүн манна мустан турарбыт биһиэхэ, оҕолорго, улахан чиэс буолар. Өрөспүүбүлүкэбит иһинэн араас күрэхтэр, тэрээһиннэр ыытыллар буоланнар, оҕолор бэйэлэрин талааннарын арыйар, көрдөрөр уонна ситиһиилэнэр кыахтара үгүс. Ааһан эрэр сылы Оҕо саас сылынан биллэриллибитэ, онон сиэттэрэн олус элбэх умнуллубат бэстибээллэри, ураты куонкурустары, спортивнай күрэхтэри, предметнэй олимпиадалары тэрийэн бэлэхтээтигит. Биһиги, дойдубут оҕолоро, өрөспүүбүлүкэбит инникилэрэ буолабыт. Онон дойдубут сайдарыгар, инники сырдык олох уларыйыыларыгар бэлэммит!
Ил Дархан Харыйата сыллар тухары бэриллэ турар саҥа дьыл үтүө үгэһэ, оҕолор күүтэр бырааһынньыктара буолла. Өссө да инникитин тэрээһин таһыма үрдүү, ситэ-хото, оттон өрөспүүбүлүкэбит бары оскуолаларын оҕолорун ситиһиилэрэ үксүү, үөрүүнү аҕала турдун. Кэлэр кэнчээри ыччат, дойдубут инникэлэрэ — кинилэр!
Тэрээһини сиһилии видео-матырыйаалга көрүҥ:
Keskil14.ru