Ил Дархан Айсен Николаев 2024 сыл ахсынньы 19 күнүнээҕи Туһаайыытын Ил Түмэҥҥэ иһитиннэрдэ.
Лөгөй лиссиэй-интэринээт директора Михаил Петрович Пухов Ил Дархан этиитин кэнниттэн санаатын маннык үллэһиннэ:
Ил Дархаммыт сылын ахсын үгэс быһыытынан Ил Түмэҥҥэ туһаайар Анал этиитэ — Саха сирин инникитин түстүүр.
Анал туһаайыыга үөрэхтээһин эйгэтигэр үлэлиир буоламмын болҕомтобун онно уурдум. Ол курдук
Саҥа кэлэр сылга оскуолаҕа быраас үлэһит быһыытынан көрүллэрин туһунан этиитин олус сэҥээрэ иһиттим. Тоҕо диэтэр оскуола иһигэр туһааннаах үлэһит баара оҕо араас буолар түгэнигэр анал көмөнү уонна өҥөнү оҥоро охсоро олус наадалаах. Уонна лицейбит 75 миэстэлээх интернаттаах буолан күннэтэ быраас өҥөтүгэр наадыйарбыт үгүс.
Орто анал үөрэхтэри кытта сибээстээхтик үлэлэһии этиигэ «Мин бастакы идэм» диэн бырайыакка киирэн 5 үөрэнээччибит Финансовай экономическай колледжка үөрэнэ сылдьаллар. Ону таһынан Уус Алданнааҕы техникумҥа 7 үөрэнээччи 50% чэпчэтиилээх суоппар үөрэҕэр үөрэхтэрин саҕалаабыттара. Онон оҕо оскуолаҕа үөрэнэ сылдьар кэмигэр бэйэтэ сөбүлүүр идэтигэр үөрэнэн, идэлээх тахсара кини инники олоххо бэлэм буоларыгар төһүү күүс буолуо диэн эрэнэбит. Эһиилги сылга өссө кэҥэтэн элбэх хайысханы кытта үлэлэһэргэ былааннаахпыт.
Бэйэм саха тылын уонна литэрэтиирэтин учуутала буоларым быһыытынан саха тылын сайыннарыыга, харыстааһыҥҥа Ил Дархан туһаайыытыгар эппит этиититигэр сөбүлэһэбин. Кырдьык саха тылынан кыайан саҥарбат буолуу аҥардас куорат сиргэ эрэ буолбакка, дэриэбинэҕэ эмиэ баар буолбута киһини долгутар. Бу маны туоратарга күүстээх үлэ барыахтааҕын, барыбыт кыһалҕата буоларын Ил Дархан сөпкө тоһоҕолоон эттэ дии саныыбын. Кинигэ, учуобунньук саҥардыллан билиҥҥи олоххо эппиэттиир, оҕо интэриэһин тардар араас ситимҥэ саха тылынан саҥарар биэриилэр элбииллэрэ наада диэн эттэ. Төрөппүккэ көмөлөр, сүбэлэр биэриилэрэ бааллара буоллар төрөппүт туһаныа, оҕотун иитиитигэр сахалыы эйгэни тэрийэригэр күүс-көмө буолуо этэ дии саныыбын.
Онон кэлэр сылга өссө элбэх соруктар күүтэллэр. Ол барыта туоларыгар, олоххо киирэригэр биир санаанан үлэлиэхпит, элбэҕи ситиһиэхпит диэн эрэнэбин.
Янис СЫСОЛЯТИН SiTiM LegMedia юнкора