От ыйын 1 күнүгэр эдэр кэрэспэдьиэннэр Бырабыыталыстыба дьиэтигэр Национальнай Бэчээт күнүгэр аналлаах үөрүүлээх тэрээһиҥҥэ сырыттыбыт. Маннык улахан тэрээһиҥҥэ бастакыбын сырыттым, ол иһин мин олохпор улахан суолталаах.
Тэрээһиҥҥэ сылдьан, элбэҕи биллим уонна саха бэчээтэ сайдыытын көрдөрөр минньигэс бэлэҕи уонна Ил Дархантан открытканы туттарбыттарыгар олус үөрдүм. Бу бэлэх туох суолталааҕый? 1908 сыллаахха «Якутский край» диэн хаһыат 1 №-гэр бастакы балаһаҕа «Нестле» туһунан суруллубут эбит. Ол иһин маннык символическай суолталаах бэлэҕи оҥорбуттар.
Мин «Кэскил» оҕо бэчээтин кыһатын иһинэн үлэлиир медиа-оскуолаҕа иккис сылбын дьарыктанабын, оттон «Кэскил» хаһыаты кытта кыра эрдэхпиттэн чугастык билсэбин. Тоҕо диэтэргит, бу хаһыат биһиги дьиэ кэргэн үс көлүөнэтин ситимниир. Ийэбинэн эбэм Павлова Роза Евсеевна өр сылларга «Кэскил» хаһыаты, хаһыат үлэһиттэрин кытта ыкса ситимнээхтик үлэлээбитэ, Кэбээйи орто оскуолатыгар «Дьоҕур» эдэр кэррэспэндьиэннэр куруһуоктарын төрүттээбит учууталынан буолар. Убайдаах эдьиийим Егор уонна Алина Павловтар эмиэ оскуолаҕа үөрэммиттэрин тухары «Кэскил» хаһыакка суруйаллара, күрэхтэргэ кыттаннар элбэхтэ наҕараадаламмыттара. Ийэм саха тылын учуутала Мария Егоровна билигин эмиэ Кэбээйигэ «Дьоҕур» медиакиин салайааччыта. Онон мин кинилэр салҕааччылара, ситими салҕыыр кэрэспэдьиэн буолуохтаахпын.
Оҕо саас умнуллубат түгэннэрин бэлэхтиир «Азия оҕолоро» VIII норуоттар икки ардыларынааҕы оҕо пресс-киининин үлэһиттэригэр, салайааччыларбытыгар махталбын этэбин.
Дуолан ПАВЛОВ, VII кылаас,
Е.Е. Эверстов аатынан Кэбээйи орто оскуолата
«Азия оҕолоро» VIII спортивнай оонньууларын пресс-киинин эдкора