Хаптаҕайтан төрүттээх гиревик Валентин Адамов XXII-с «Манчаары оонньууларыгар» күүстээхтик бэлэмнэнэ сылдьар. Валентин Адамов – Мэҥэ Хаҥалас улууһун Хаптаҕай нэһилиэгиттэн төрүттээх, гиирэ спордун маастарыгар кандидат. Быйыл «Манчаары оонньууларыгар» иккис төгүлүн кыттар.
Валентин гиирэ спордугар Мэҥэ Хаҥалас улууһун, Саха сирин уонна Арассыыйа чыпчаалларын хас да төгүллээх кыайыылааҕа уонна призера. Ол курдук, 2021 с. Улан-Удэ куоракка ыытыллыбыт Сергей Леонов аатынан күрэх чөмпүйүөнэ; 2024 с. Санкт-Петербургка Аан дойду кубогын «Белые ночи» түһүмэҕин призера.
Валентины гиирэ спордунан дьарыктаныытыгар Мэҥэ Хаҥалас улууһун гиирэ спордун сайыннарар уонна үрдэтэр убаастабыллаах бэрэстэбиитэлэ Виталий Михайлович Пестряков улахан оруолу оонньообут. Кини Валентины маҥнайгы күрэҕигэр кыттарын көрөн, кини иһигэр баар ураты талаанын, кыаҕын харыстаабакка туһанарын, өһөс тулуурдааҕын уонна кыайар баҕа санаатын хайҕаан улуус сборнайыгар киириигэ тириэрдибитэ.
«Бэлэмнэнии үчүгэй, нэдиэлэҕэ алтата дьарыктанабын. Сбор тэриллэн дьарык күүскэ бара турар»
— диэн Валентин бэлэмнэниитин туһунан кэпсээтэ.
Кинини дьарыктаабыт тренердэрэ:
- гиирэ спордугар Сахаада маастара Владимир Семенович Михайлов;
- гиирэ спордун сүрүн судьуйата Василий Николаевич Дьячковскай;
- Билигин сүрүннүүр тренерэ — гиирэ спордугар Арассыыйа маастара Владимир Владимирович Оленов.
«Манчаары оонньууларыгар тыҥааһыннаах күрэхтэһиилэри, үрдүк көрдөрүүлэри, ситиһиилэри күүтэбин!», – диир Валентин. Кини Манчаарыга кыайыыта – төрөөбүт нэһилиэгин уонна Мэҥэ Хаҥалас улууһун аатын үрдэтиитигэр тэҥнээҕин эттэ.
Биир дойдулаахпытыгар үрдүк ситиһиилэри, кыайыыны баҕарабыт!
Дарина Иванова, 8 кылаас, Гражданскай сэрии Дьоруойа Кеша Алексеев аатынан Хаптаҕай орто оскуолата, Мэҥэ Хаҥалас.