Олунньу ый 11 күнүгэр Өктөм нэһилиэгэр «Ийэ тылбыт этигэн кэрэтэ» диэн Төрөөбүт тыл, сурук-бичик күнүн көрсө Хаҥалас улууһугар улахан тэрээһин ыытыллыбыта.
Бу тэрээһиҥҥэ оҕолор олоҥхо, хоһоон, оһуохай, театральнай көрдөрүү, чабырҕах, онтон да атын саха омугун фольклорун көрүҥнэригэр күрэхтэстилэр.
Сарсыарда биһиги Өктөм оскуолатыгар 9:30 чааска кэлбиппит. Биһигини саха омугун үгэһинэн саламааттаах алаадьынан күндүлээбиттэрэ.
10 чааска күрэх арыллыыта буолбута. Алгысчыт саха сиэрин-туомун тутуһан, алгыстаах уотун уматан, саламааттаах алаадьынан күндүлээбитэ.
Биһиги оскуолабытыттан 10 уол кытта барбыта. Тэрээһиҥҥэ кытта кэлбит оҕолор уонна учууталлар бары сахалыы таҥастаах этибит. 11 чаастан күрэхтэр саҕаламмыттара. Бастаан оһуохай эппиттэрэ. Онно биһиги оскуолабыт 8 кылааһын үөрэнээччитэ Дархан Тихонов кыттыбыта, биһиги бары киниэхэ кынат буолан, эмиэ оһуохайдаспыппыт. Дархан бу кэннэ олоҥхоҕо кыттан, 1 миэстэ буолбута.
Күнүс 13 чааска хоһоон этиитэ саҕаламмыта. Биһиги кыттааччыларбыт 8 кылаас үөрэнээччилэрэ: Дархан Тихонов, Валериан Лукин, Артем Тимофеев, Стас Громов, Женя Черёмкин, Владик Афанасьев, 10 кылаастан Сережа Павлов, 7-тэн Аман Еремеев, 11-тэр Дуолан Калитин, Антон Кириллин. Бары үөрэппит хоһооммутун эппиппит.
14:30 чааска дьүүллүүр сүбэ ким кыайыылааҕын быһаарбыта.
15 чааска түмүк тахсыбытын биллэрбиттэрэ. Түмүктэр манныктар: Аман Еремеев — 3 миэстэ, Сережа Павлов — 2 миэстэ, 8 кылаас бөлөҕө биһирэбил дипломунан наҕараадаламмыта.
Бары кыайан олус үөрбүппүт. Уопсай хаартыскаҕа түһэн, үөрэн-көтөн дьиэбитигэр тарҕаспыппыт.
Аман Еремеев,
М.Е. Васильева аатынан 2-с Малдьаҕар орто оскуолатын 7 кылааһын үөрэнээччитэ.